नीट पेपर फुटीमुळे डॉक्टर होण्याचे स्वप्न भंगलं; परभणीतील १९ वर्षीय प्रथमेश राठोडने जीवन संपवलं

एज्युवार्ता न्यूज नेटवर्क 

नीट-यूजी २०२६ (NEET-UG 2026) परीक्षेच्या पेपर फुटीच्या (NEET Exam Paper Leak) प्रकरणानंतर महाराष्ट्रात आणखी एका विद्यार्थ्याने आत्महत्या (Student Commits Suicide) केल्याची घटना समोर आली आहे. परभणी जिल्ह्यातील गंगाखेड तालुक्यातील गोदावरी तांडा येथील १९ वर्षीय प्रथमेश मोहन राठोड (Student Suicide) या तरुणाने विषारी औषध प्राशन करून आपली जीवनयात्रा संपवली. पेपर फुटल्यानंतर पुन्हा परीक्षा द्यावी लागणार, तयारी करावी लागणार या विवंचनेत तो व्याकूळ झाला होता, अशा भावना कुटुंबियांनी व्यक्त केल्या आहेत. 

बंजारा समाजातील प्रथमेश खडतर परिश्रम करत डॉक्टर होण्याचे स्वप्न उराशी बाळगत होता. घरची परिस्थिती हालाकिची असताना देखील नांदेड येथे नीटची तयारी करत होता. चार दिवसांपूर्वी तो गावाकडे आला होता. रात्री जेवणानंतर अभ्यासासाठी तो आपल्या खोलीत गेला. मात्र, मध्यरात्री एक वाजता उलट्या करत असल्याचा आवाज ऐकून आई धावत गेली. तेव्हा विषारी औषधाचा वास आला. प्रथमेशने आईला “नीट परीक्षेत पास होईल का?” असे विचारले. कुटुंबीयांनी त्याला तातडीने गंगाखेड उपजिल्हा रुग्णालयात दाखल केले, मात्र डॉक्टरांनी त्याला मृत घोषित केले.

"आधीचा पेपर देवून तो खूप खुश होता. पण पेपर फुटल्याचे कळताच तो टेन्शनमध्ये आला. आई, आता कसे होईल? पुन्हा पेपर कसा देईन? असे तो सतत म्हणत होता. मी त्याला टेन्शन घेऊ नको म्हणाले होते, पण तो सतत चिंतेत होता. पेपर फुटीवाले सामान्य विद्यार्थ्यांच्या आयुष्याशी खेळत आहेत. आमच्या मुलाचे डॉक्टर होण्याचे स्वप्न भंग पावले, अशी दुःखद भावना प्रथमेशच्या आई-वडिलांनी व्यक्त केली आहे.

प्रथमेशने नीट परीक्षा दिली होती आणि चांगले मार्क मिळतील असा विश्वास होता. मात्र पेपर फुटल्याने परीक्षा रद्द झाल्याने त्याचे मानसिक संतुलन बिघडले, आणि तो सतत चिंतेत राहात होता शेवटी त्याने हे टोकाचे पाऊल उचलले. गंगाखेड पोलीस स्टेशनमध्ये विनायक राठोड यांच्या तक्रारीवरून प्रकरण दाखल करण्यात आले असून, पुढील तपास सुरू आहे.

नीट पेपर फुटी प्रकरणाने देशभरात खळबळ माजली आहे. परीक्षा रद्द होऊन पुन्हा परीक्षा घेण्याचे नियोजन असले तरी अनेक विद्यार्थी आणि कुटुंबीय मानसिक तणावाखाली आहेत. या प्रकरणात आतापर्यंत अनेक विद्यार्थ्यांनी आत्महत्या केल्याच्या घटना समोर आल्या आहेत. शिक्षण क्षेत्रातील पारदर्शकता आणि सुरक्षितता सुनिश्चित करण्याची मागणी आता जोर धरू लागली आहे. प्रथमेशसारख्या मेहनती विद्यार्थ्यांच्या आयुष्याशी खेळणाऱ्या घटनांमुळे संपूर्ण शिक्षण व्यवस्थेवर प्रश्नचिन्ह उभे राहिले आहे.