१२.५ लाख विद्यार्थ्यांची प्रतीक्षा संपली, अकरावी प्रवेशाची पहिली गुणवत्ता यादी प्रसिद्ध

एज्युवार्ता न्यूज नेटवर्क 

महाराष्ट्रातील इयत्ता अकरावीच्या (11th Admission Process) केंद्रीय ऑनलाइन प्रवेश प्रक्रियेत (FYJC CAP) सहभागी झालेल्या सुमारे १२.५ लाख विद्यार्थ्यांची प्रतीक्षा आज संपली. शिक्षण संचालनालयाने सकाळी ११ वाजता कॅप फेरी-१ ची पहिली गुणवत्ता यादी (Allotment List) प्रसिद्ध केली. अधिकृत वेबसाइट mahafyjcadmissions.in वर ही यादी उपलब्ध करण्यात आली आहे. मात्र, सर्व विद्यार्थी एकाच वेळी संकेतस्थळावर आल्याने त्याला वेळ लागत असल्याचे दिसून येत आहे. 

यंदा राज्यभरातून यावर्षी सुमारे १२.५ लाख (१२,५१,२९४) विद्यार्थ्यांनी नोंदणी केली आहे. हजारांहून अधिक विद्यार्थ्यांनी ऑनलाइन नोंदणी केली होती. उपलब्ध जागा सुमारे २१ लाखांवर असल्याने विद्यार्थ्यांना चांगल्या पर्यायांची संधी उपलब्ध आहे. प्रक्रियेत अनेकदा वेळापत्रकात बदल झाल्याने विद्यार्थी आणि पालकांच्या मनात अनिश्चितता होती. मात्र, आजची घोषणा ही सर्वांसाठी दिलासादायक ठरली आहे.

कसे तपासाल यादी?

विद्यार्थ्यांनी mahafyjcadmissions.in या संकेतस्थळावर लॉगिन करून आपला अर्ज क्रमांक, पासवर्ड आणि शाखा कला, वाणिज्य, विज्ञान निवडून वाटप यादी तपासावी. यात वाटप झालेल्या महाविद्यालयाचे नाव, कट-ऑफ गुण आणि इतर माहिती उपलब्ध होईल. वाटप झालेल्या विद्यार्थ्यांना २९ मे ते ३ जून २०२६ सायंकाळी ६ वाजेपर्यंत प्रवेश निश्चित करावा लागेल. यामध्ये फी भरून जागा निश्चित करणे आवश्यक असल्याचे सांगण्यात आले आहे. 

शिक्षण विभागाने यंदा प्रक्रिया अधिक पारदर्शक आणि सोयीस्कर करण्यासाठी नवीन नियमावली लागू केली आहे. विद्यार्थ्यांना दहा पसंतीक्रम भरणे बंधनकारक आहे. मुलींसाठी स्वतंत्र राखीव फेरी, इन-हाउस, मॅनेजमेंट आणि कोटा श्रेणीतील प्रवेश यंत्रणा देखील कार्यान्वित आहे. प्रक्रिया पाच फेऱ्यांमध्ये पूर्ण होणार असून, १५ जुलैपर्यंत नियमित वर्ग सुरू करण्याचे नियोजन आहे.