महाराष्ट्र कौशल्य विकास विद्यापीठाला रतन टाटा यांचे नाव; मंत्रिमंडळाचा निर्णय 

एज्युवार्ता न्यूज नेटवर्क 

नुकत्याच पार पडलेल्या मंत्रिमंडळ बैठकीत राज्य सरकारने मोठी घोषणा केली आहे. महाराष्ट्र मंत्रिमंडळाने (Maharashtra Cabinet) महाराष्ट्र कौशल्य विद्यापीठाचे (Maharashtra Kaushalya Vidyapeeth) नाव बदलण्याचा महत्त्वपूर्ण निर्णय घेतला आहे. या विद्यापीठाला आता दिवंगत उद्योगपती रतन टाटा (Ratan Tata) यांचे नाव देण्यात येणार आहे. रतन टाटा यांच्या सन्मानार्थ सरकारने हा निर्णय घेतला आहे. महाराष्ट्र कौशल्य विकास विद्यापीठ आता 'पद्मविभूषण रतन टाटा महाराष्ट्र राज्य कौशल्य विद्यापीठ' म्हणून ओळखले जाणार आहे. याबद्दलची माहिती कौशल्य विकास मंत्री मंगल प्रभात लोढा यांनी दिली. 

राज्याचे कौशल्य विकास मंत्री मंगलप्रभात लोढा यांनी दिलेल्या माहितीनुसार, 'राज्य सरकारने महाराष्ट्र कौशल्य विकास विद्यापीठाला रतन टाटा यांचं नाव देण्यात आलं आहे. या निर्णयाला मंत्रिमंडळाने संमती दर्शवली असून याची लवकरच अंमलबजावणी केली जाणार आहे.'

 ‘स्किल इंडिया मोहिमे’अंतर्गत 15 जुलै 2015 रोजी कौशल्य विकास विद्यापीठाची मुंबई आणि पुणे येथे स्थापन करण्याची घोषणा करण्यात आली. पंतप्रधानांनी या मोहिमेंतर्गत संपूर्ण भारतातील चाळीस कोटी लोकांना कुशल बनविण्याचे आश्वसन दिले दिले आहे. याचाच एक भाग म्हणून कौशल्य विद्यापीठाच्या मुख्य वास्तूचा भूमिपूजन समारंभ अलिबागमध्ये 2023 मध्ये पार पडला. या विद्यापीठातर्फे सायबर सुरक्षा, कृत्रिम बुद्धिमत्ता, क्लाऊड कॉम्पुटिंग, उद्योग 4.0, बांधकाम व्यवस्थापन या विषयांमध्ये एम. टेक. अभ्यासक्रम तसेच बिझनेस ऍनालिसिस या विषयात एम एस्सी. अभ्यासक्रम, एमबीए तसेच विविध आधुनिक विषयातील प्रमाणपत्र अभ्यासक्रम सुरू करण्यात आले आहेत. कौशल्य विकास विद्यापीठाअंतर्गत येणाऱ्या अभ्यासक्रमाची संपूर्ण माहिती संकेतस्थळावर देण्यात आली आहे.