विद्यापीठाच्या अर्थसंकल्पात विद्यार्थ्यांना काय मिळाले...

सावित्रीबाई फुले पुणे विद्यापीठाच्या २०२३-२४ या आर्थिक वर्षाचा ५२४ कोटी जमेचा व सुमारे ६०१ कोटी खर्चाचा अर्थसंकल्प विद्यापीठाचे प्र. कुलगुरू डॉ. संजीव सोनवणे यांनी शनिवारी विद्यापीठाच्या अधिसभेत सादर केला.अधिसभा सदस्यांनी सूचना मांडल्यानंतर एकमताने अर्थसंकल्प मंजूर करण्यात आला.

   विद्यापीठाचे कुलगुरू कारभारी काळे यांच्या अध्यक्षतेखाली शनिवारी पार पडलेल्या अधिसभेत अर्थसंकल्पाला अधिसभेत मंजुरी देण्यात आली. यावेळी विद्यापीठाचे कुलसचिव डॉ.प्रफुल्ल पवार वित्त व लेखा अधिकारी चारुशीला गायके, विद्यापीठाच्या सर्व प्रशासकीय अधिकारी उपस्थित होते.

एकूण अर्थसंकल्पाच्या तब्बल ५६ टक्के तरतूद विद्यार्थी विकासासाठी करण्यात आली असून सुमारे २५५ कोटी रुपये विद्यार्थ्यांच्या सोयी सुविधांसाठी खर्च केली जाणार आहे.विद्यापीठात संगीत भवन स्थापन करण्यात येणार आहे.

कमवा व शिका योजनेला प्रोत्साहन देण्यासाठी ग्रीन हाऊस तयार केले जाणार असून नुकत्याच सुरू झालेल्या राष्ट्रीय छात्र सेनेसाठी (एनसीसी) तरतूद केली आहे.तसेच विद्यापीठात  योग ट्रेनिंग व थेरपी केंद्र स्थापन करण्याची घोषणा यावेळी करण्यात आली. त्याचप्रमाणे फाईन आर्ट विभागासाठी स्वतंत्र इमारत बांधणे,इलेक्ट्रिक व्हेईकल चार्जिंग स्टेशन सुरू करणे,विज्ञान परिषदेला विद्यार्थ्यांना पाठवण्यासाठी आर्थिक मदत,शिक्षकांचे आदान -प्रदान करणे,भाषाशास्त्र व अनुवाद अभ्यास केंद्र ,भारतीय ज्ञान व्यवस्था अभ्यास केंद्र,तृणधान्य अभ्यास केंद्र सुरू करणे अशा विविध बाबींसाठी तरतुदी करण्यात आल्या.

   विद्यार्थ्यांसाठी काही वर्षांपूर्वी सुरू करण्यात आलेल्या क्रांतीज्योती सावित्रीबाई फुले अर्थसहाय्य योजनेसाठी १ कोटी रुपये, लोकशाहीर आण्णाभाऊ साठे आर्थिक दुर्बल घटक विद्यार्थी अर्थ सहाय्य योजनेसाठी १ कोटी रुपये, छत्रपती राजश्री शाहू महाराज शिष्यवृत्तीसाठी २ कोटी रुपये, महात्मा ज्योतिराव फुले गुणवंत विद्यार्थी शिष्यवृत्ती योजनेसाठी २ कोटी रुपये तर स्वामी विवेकानंद विद्यार्थी सहाय्यक योजनेसाठी ३ कोटी २५ लाख रुपयांची भरू तरतूद करण्यात आली आहे. त्याचप्रमाणे विद्यार्थ्यांसाठी वस्तीगृह बांधण्याचा विद्यापीठाचा मानस आहे.

   विद्यापीठातर्फे राबविल्या जात असलेल्या कर्मवीर भाऊराव पाटील कमवा व शिका योजनेसाठी ५ कोटी रुपयांची तरतूद प्रस्तावित करण्यात आले आहे त्याचप्रमाणे समर्थ भारत अभियानासाठी १ कोटी तर आपत्कालीन व्यवस्थापन प्रशिक्षणासाठी ५० लाखांची तरतूद केली आहे विद्यार्थी वस्तीगृहासाठी १३ कोटी ३१ लाख रुपयांची तरतूद प्रस्तावित आहे.