विद्यार्थ्यांच्या आत्महत्या रोखण्यासाठी बदलणार वसतिगृहातील पंखे

एज्युवार्ता न्यूज नेटवर्क 

NEET आणि JEE सह इतर स्पर्धा परीक्षांचे कोचिंग हब म्हणून ओळखल्या जाणाऱ्या राजस्थान येथील कोटा (Kota in Rajasthan) शहर आता विद्यार्थ्यांच्या आत्महत्येसाठी (Student suicides )चर्चेत आले आहे. या वर्षात आतापर्यंत २० पेक्षा अधिक स्पर्धा परीक्षेच्या विद्यार्थ्यांनी आत्महत्या केल्या आहेत. वाढत्या आत्महत्या रोखण्यासाठी कोटा जिल्हा प्रशासनाने अजब निर्णय घेतला आहे. वसतिगृहाच्या सर्व खोल्यांमध्ये स्प्रिंग लोडेड पंखे (spring loaded fans) बसवण्याचे एक विचित्र पाऊल उचलले आहे. हे पंखे वजनाने खाली येतील. परिणामी  विद्यार्थी पंख्याला लटकून आत्महत्या करू शकत नाहीत, यामुळे विद्यार्थ्यांच्या आत्महत्येचे प्रमाण कमी होईल, असा अजब तर्क जिल्हा प्रशासनाने लावला आहे.

कोटाचे जिल्हाधिकारी ओम प्रकाश बनकर यांनी हा आदेश प्रसिध्द केला आहे.  जिल्हा प्रशासनाच्या आदेशानंतर कोटा शहरातील सर्व वसतिगृहांच्या खोल्यांमध्ये आणि पेइंग गेस्ट हाऊसमध्ये स्प्रिंग लोडेड पंखे बसवणे बंधनकारक करण्यात आले आहे. हे पंखे छतावरून स्प्रिंगद्वारे खोलीत फिक्स करण्यात येणार आहेत. थोड्या वजनाने सुध्दा हे पंखे  खाली येतील. आदेशाचा उद्देश या निवासी  स्थानांमध्ये शिकणाऱ्या आणि राहणाऱ्या विद्यार्थ्यांना मानसिक आधार आणि सुरक्षा प्रदान करणे असा आहे.  तसेच कोचिंगच्या विद्यार्थ्यांच्या वाढत्या आत्महत्या थांबवणे असा आहे, असे या आदेशात नमूद करण्यात आले आहे.

या उपाययोजनांचे पालन न केल्यास घरे आणि संस्था जप्त केल्या जातील आणि मालकांवर आवश्यक कारवाई केली जाईल, असा इशारा जिल्हा प्रशासनांकडून देण्यात आला आहे. दरम्यान  जेईईची तयारी करणाऱ्या १८ वर्षीय विद्यार्थ्याच्या आत्महत्येनंतर काही दिवसांतच हा आदेश काढण्यात आला आहे.