बोस्टन युनिव्हर्सिटीत शिकलेल्या तरुणाने स्थापन केली 'कॉकरोच जनता पार्टी', लाखो विद्यार्थी सदस्य 

एज्युवार्ता न्यूज नेटवर्क 

भारतातील युवा आणि शिक्षण व्यवस्थेतील गंभीर प्रश्नांना व्यंग्याच्या माध्यमातून आवाज देणारी एक अनोखी चळवळ सुरू झाली आहे. बोस्टन युनिव्हर्सिटीमध्ये (Boston University) पब्लिक रिलेशन्सचा अभ्यास करणाऱ्या ३० वर्षीय अभिजीत दीपके (Abhijeet Dipke) यांनी कॉकरोच जनता पार्टी (CJP) ही सॅटिरिकल राजकीय चळवळ सुरू केली आहे. ही चळवळ मुख्यतः सर्वोच्च न्यायालयाचे सरन्यायधीश सूर्यकांत (CJI Suryakant) यांच्या 'कॉकरोच' वक्तव्यामुळे उदयास आली. मात्र याचे मूळ शिक्षण, बेरोजगारी आणि परीक्षा घोटाळ्यांमध्ये आहे. 

१५ मे रोजी सर्वोच्च न्यायालयातील एका सुनावणीत मुख्य न्यायमूर्तींनी बेकायदेशीर डिग्री घेतलेल्या बेकार युवकांना 'कॉकरोच' म्हणून संबोधले. याला अभिजीत यांनी व्यंग्यात्मक प्रतिसाद देत १६ मे रोजी एक्स वर गुगल फाॅर्मद्वारे साइन-अप सुरू केले. अवघ्या काही दिवसांत लाखो विद्यार्थी आणि युवक, विशेषतः Gen-Z या चळवळीशी जोडले गेले. सध्या सोशल मीडियावर ही चळवळ तुफान व्हायरल झाली आहे. 

अभिजीत दीपके या विद्यार्थ्यांने पुण्यात पत्रकारिता शिक्षण घेतले. नंतर उच्च शिक्षणासाठी अमेरिकेत गेला. बोस्टन युनिव्हर्सिटीमध्ये पब्लिक रिलेशन्सचा मास्टर्स पूर्ण केले. त्याच्या मते, ही चळवळ केवळ व्यंग्य नाही तर युवकांच्या खऱ्या नाराजीचा आवाज आहे. "शिक्षण व्यवस्था युवकांना बेरोजगार तयार करत आहे. परीक्षा घोटाळे, उच्च शिक्षणातील महागाई आणि नोकऱ्यांचा अभाव यामुळे युवक निराश आहेत," असे त्याचे मत आहे. 

कॉकरोच जनता पार्टीच्या घोषणापत्रात न्यायव्यवस्था, मीडिया, महिला आरक्षण, फ्लोर क्रॉसिंगवर बंदी यासोबत शिक्षण सुधारणा आहेत. ही चळवळ खरी राजकीय पार्टी नाही, तर इंटरनेटवर युवकांना एकत्र करणारे व्यासपीठ आहे. शिक्षण क्षेत्रातील सुधारणा, परीक्षा प्रक्रियेची पारदर्शकता आणि रोजगाराशी जोडलेल्या शिक्षणावर भर देणारी ही चळवळ युवा मनात आशा निर्माण करत आहे. 'मेन भी कॉकरोच' अशा घोषणेसह हजारो विद्यार्थी यात सामील होत आहेत.