NEET NEWS: मुलासाठी पेपर खरेदी केल्याच्या आरोपाखाली विद्यार्थ्याच्या पालकाला अटक
पेपरफुटी प्रकरणात एखाद्या विद्यार्थ्याच्या पालकाला अटक होण्याची ही पहिलीच वेळ आहे. डॉ. शिरुरे यांनी नेमका कोणाकडून पेपर विकत घेतला आणि तो पुढे कोणाला दिला होता का?, याचा तपास सीबीआय करत आहे.
eduvarta@gmail.com 
एज्युवार्ता न्यूज नेटवर्क
नीट-युजी (NEET-UG) परीक्षा पेपरफुटी प्रकरणात रोज नवनवीन माहिती समोर येत आहे. आता केंद्रीय अन्वेषण विभागाने (CBI) नीट पेपरफुटी प्रकरणात (Paper Leak Scandal) लातूरमधील बालरोगतज्ज्ञ डॉ. मनोज शिरुरे (Dr. Manoj Shirure) यांना अटक केली आहे. स्वतःच्या मुलासाठी पेपर खरेदी केल्याचा आरोप त्यांच्यावर ठेवण्यात आला आहे. पेपरफुटीच्या रॅकेटमधील पालकाला झालेली ही पहिलीच अटक (Parent Arrested) असून, या प्रकरणामुळे खळबळ उडाली आहे. सीबीआयने डॉ. शिरुरे यांना लातूर येथून ताब्यात घेतले होते. काही तासांच्या सखोल चौकशीनंतर आणि त्यांच्या मोबाईलमध्ये प्रश्नपत्रिका व संशयास्पद माहिती आढळल्यानंतर त्यांना अटक करण्यात आली आहे.
प्राथमिक तपासात डॉ. शिरुरे हे लातूरमधील आरसीसी कोचिंग क्लासेसचे संचालक शिवराज मोटेगावकर आणि केमिस्ट्री प्राध्यापक पी. व्ही. कुलकर्णी यांच्या संपर्कात असल्याचे समोर आले आहे. या पेपरफुटी प्रकरणात सीबीआयने आतापर्यंत मास्टरमाईंड पी. व्ही. कुलकर्णी, प्रा. शिवराज मोटेगावकर, ब्युटीपार्लर चालवणाऱ्या मनीषा वाघमारे आणि प्रा. मनिषा मांढरे यांनाही यापूर्वीच अटक केली आहे.
पेपरफुटी प्रकरणात एखाद्या विद्यार्थ्याच्या पालकाला अटक होण्याची ही पहिलीच वेळ आहे. डॉ. शिरुरे यांनी नेमका कोणाकडून पेपर विकत घेतला आणि तो पुढे कोणाला दिला होता का?, याचा तपास सीबीआय करत आहे. सीबीआय आता डॉ. शिरुरे यांचा मोबाईल, कॉल रेकॉर्ड्स, आर्थिक व्यवहार आणि इतर कनेक्शन्सचा सखोल तपास करत आहे.
या अटकेमुळे आणखी पालक किंवा विद्यार्थी यांच्यावर कारवाई होण्याची शक्यता वाढली आहे. सीबीाय अधिकाऱ्यांनी सांगितले की, “हे प्रकरण फक्त काही व्यक्तींपुरते मर्यादित नाही, तर एक मोठं नेटवर्क कार्यरत होतं.” ही अटक नीट परीक्षेच्या पारदर्शकतेवर पुन्हा एकदा प्रश्न उपस्थित करते. विद्यार्थ्यांच्या मेहनतीला आणि पालकांच्या विश्वासाला धक्का बसवणाऱ्या अशा घटना रोखण्यासाठी कठोर उपाययोजना करण्याची मागणी आता जोर धरू लागली आहे.
