सीईटी सेलचा मोठा निर्णय, राज्यात यापुढे एकच सीईटी परीक्षा होणार 

एज्युवार्ता न्यूज नेटवर्क

महाराष्ट्र राज्य सामाईक प्रवेश परीक्षा कक्षाने (CET Cell) शिक्षण क्षेत्रातील अभ्यासक्रमांसाठी एक महत्त्वाचा निर्णय (Important Decision) घेतला आहे. बी.एड (जनरल आणि स्पेशल), बी.पी.एड आणि बी.एड-एम.एड (इंटिग्रेटेड) या अभ्यासक्रमांसाठी (B.Ed., B.P.Ed., and B.Ed.-M.Ed. Programs) स्वतंत्र CET परीक्षा घेण्याची प्रथा बंद करून, २०२७-२८ शैक्षणिक वर्षापासून (2027-28 academic year) एकच सामाईक CET परीक्षा घेण्यात येणार आहे. या निर्णयामुळे विद्यार्थ्यांवरील परीक्षांचा भार कमी होणार असून, प्रवेश प्रक्रिया अधिक सोपी आणि पारदर्शक होईल, असे स्पष्ट करण्यात आले आहे.  

सीईटी सेलच्याच्या अधिकृत सूचनेनुसार, सध्या या तीनही अभ्यासक्रमांसाठी वेगवेगळ्या परीक्षा घेतल्या जातात. यामुळे विद्यार्थ्यांना अनेकदा वेगवेगळ्या तारखांना परीक्षा द्याव्या लागतात. प्रवेशासाठी वेगवेगळे अर्ज भरावे लागतात आणि त्यामुळे आर्थिक व मानसिक ताण वाढतो. नव्या निर्णयानुसार एकाच परीक्षेच्या गुणांवर आधारित सर्व अभ्यासक्रमांसाठी केंद्रीकृत प्रवेश प्रक्रिया राबवली जाईल. यामुळे विद्यार्थ्यांना एकदा तयारी करून एकाच परीक्षेद्वारे अनेक पर्याय उपलब्ध होतील.

या निर्णयाद्वारे विद्यार्थ्यांवरील परीक्षांचा ओझे कमी करणे. प्रवेश प्रक्रिया जलद आणि सोपी करणे. एकसमान मूल्यमापन पद्धती राबवणे आणि शिक्षण क्षेत्रात गुणवत्ता वाढवणे, असे या निर्णयाचा मुख्य उद्देश असल्याचे सांगितले जात आहे. हा निर्णय विद्यार्थ्यांसाठी फायद्याचा ठरेल. विशेषतः ग्रामीण भागातील विद्यार्थ्यांना याचा मोठा लाभ होईल, कारण त्यांना अनेक परीक्षांसाठी वारंवार मुंबई किंवा इतर केंद्रांवर जाण्याची गरज भासणार नाही. मात्र, परीक्षेचे स्वरूप, अभ्यासक्रम आणि गुणवत्ता कशी राहील, याबाबतही स्पष्टता आवश्यक आहे, असे मत शिक्षण तज्ज्ञांनी व्यक्त केले आहे. 

सीईटी सेलच्या अधिकाऱ्यांनी सांगितले की, हा निर्णय विद्यार्थ्यांच्या हितासाठी घेण्यात आला असून, याची अंमलबजावणी २०२७-२८ पासून होईल. सध्याच्या २०२६-२७ सत्रासाठी स्वतंत्र परीक्षा सुरूच राहतील. अधिकृत वेळापत्रक आणि सविस्तर सूचना लवकरच cetcell.mahacet.org वर जाहीर करण्यात येतील. विद्यार्थ्यांनी नियमितपणे अधिकृत वेबसाइट तपासावी, असे आवाहन करण्यात आले आहे.