दुःखद बातमी : ज्येष्ठ शिक्षणतज्ज्ञ डॉ. राम ताकवले यांचे निधन
राज्यातील आणि देशातील शिक्षण क्षेत्रात बदल करण्यासाठी त्यांनी महत्त्वपूर्ण योगदान दिले. शिक्षण हे चार भिंतीत अडकून ठेवू नये , विद्यार्थ्यांना कौशल्य आणि प्रात्यक्षिकातून शिक्षण मिळावे, असा त्यांचा आग्रह होता.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाचे (SPPU) माजी कुलगुरू व ज्येष्ठ शिक्षणतज्ज्ञ डॉ. राम ताकवले (Dr. Ram Takawale) यांचे शनिवारी रात्री १० वाजता निधन झाले. रविवारी (दि.१४) सकाळी १० वाजता वैकुंठ स्मशानभूमीत त्यांच्या पार्थिवावर अंत्यसंस्कार केले जाणार आहेत.
डॉ. ताकवले यांनी १९५६ मध्ये फर्ग्युसन महाविद्यालयातून बी.एस्सी, आणि १९५७ मध्ये पुणे विद्यापीठातून एम.एस्सी. पदवी प्राप्त केली. त्यांनी भौतिकशास्त्र आणि सैद्धांतिक भौतिकशास्त्राचा अभ्यास केला. पुणे विद्यापीठाचे ११ वे कुलगुरू म्हणून त्यांनी १९८८-१९८९ या कालावधीत विद्यापीठाचा नावलौकिक वाढवण्यात मोलाचे कार्य केले.
राज्यातील आणि देशातील शिक्षण क्षेत्रात बदल करण्यासाठी त्यांनी महत्त्वपूर्ण योगदान दिले. शिक्षण हे चार भिंतीत अडकून ठेवू नये, विद्यार्थ्यांना कौशल्य आणि प्रात्यक्षिकातून शिक्षण मिळावे, असा त्यांचा आग्रह होता. सर्व शैक्षणिक संस्थांनी व विद्यापीठांनी विद्यार्थ्यांना ऑनलाइन पद्धतीने शिक्षण उपलब्ध करून द्यावे; यासाठी त्यांनी विविध पातळ्यांवर प्रयत्न केले.
पदवीपर्यंतचे शिक्षण फर्ग्युसन महाविद्यालयातून पूर्ण केल्यानंतर भौतिकशास्त्रातील पदव्युत्तर पदवीचे शिक्षण पुणे विद्यापीठातून आणि संशोधन पदवी मास्को स्टेट विद्यापीठामधून प्राप्त केली. पदव्युत्तर शिक्षण प्राप्त केल्यानंतर ते पुणे विद्यापीठाच्या भौतिकशास्त्र विभागात प्राध्यापक म्हणून रुजू झाले. त्यांच्याच प्रयत्नांतून १९८९ मध्ये यशवंतराव चव्हाण महाराष्ट्र मुक्त विद्यापीठाची स्थापना झाली. मुक्त विद्यापीठाचे पहिले कुलगुरू म्हणून त्यांची नियुक्ती करण्यात आली. १९९६ ते १९९८ या काळात त्यांच्याकडे इंदिरा गांधी राष्ट्रीय मुक्त विद्यापीठाच्या कुलगुरू पदाची जबाबदारी सोपविण्यात आली. त्याशिवाय नॅशनल असेसमेंट अँड अॅक्रिडिटेशनल कौन्सिल (नॅक) या राष्ट्रीय संस्थेचे अध्यक्षपदही त्यांनी भूषवले.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
