महाविद्यालयांना AISHE कोड सक्तीचा; शिष्यवृत्ती, संलग्नीकरण, नॅकसाठी प्रमाणपत्र अनिवार्य
विद्यापीठाचे संलग्नीकरण (Affiliation), परीक्षा निकाल, विविध प्रकारच्या मान्यता, शिष्यवृत्ती (Scholarship) आणि 'नॅक' (NAAC) मूल्यांकनाशी संबंधित कोणत्याही कामासाठी AISHE प्रमाणपत्र सादर करणे बंधनकारक असेल.
Eduvarta
0
एज्युवार्ता न्यूज नेटवर्क
राज्यातील सर्व विद्यापीठे तसेच त्यांच्या अंतर्गत येणाऱ्या सर्व संलग्नित व स्वायत्त महाविद्यालयांना भारत सरकारच्या अखिल भारतीय उच्च शिक्षण सर्वेक्षणांतर्गत (AISHE) वेबपोर्टलवर नोंदणी करून 'AISHE Code' व प्रमाणपत्र प्राप्त करणे उच्च शिक्षण संचालनालयाने सक्तीचे केले आहे. तसेच याबाबत दिरंगाई करणाऱ्यावर कारवाई करावी, असे आदेश राज्याचे उच्च शिक्षण संचालक डॉ. शैलेंद्र देवळाणकर यांनी सर्व विद्यापीठे व विभागीय सहसंचालक यांना दिले आहेत.
केंद्रीय शिक्षण मंत्रालयामार्फत दरवर्षी हे सर्वेक्षण राबवले जाते. अनेक महाविद्यालयांकडे कोड असूनही माहिती न भरणे किंवा नवीन महाविद्यालयांनी नोंदणीच न करणे, अशा त्रुटी समोर आल्याने हा निर्णय घेण्यात आला आहे.
यापुढे विद्यापीठाचे संलग्नीकरण (Affiliation), परीक्षा निकाल, विविध प्रकारच्या मान्यता, शिष्यवृत्ती (Scholarship) आणि 'नॅक' (NAAC) मूल्यांकनाशी संबंधित कोणत्याही कामासाठी AISHE प्रमाणपत्र सादर करणे बंधनकारक असेल. त्याशिवाय विद्यापीठ किंवा नोडल कार्यालयाकडून पुढील कोणतीही कार्यवाही स्वीकारली जाणार नाही.
ज्या संस्थांनी अद्याप नोंदणी केलेली नाही, त्यांच्यासाठी विद्यापीठांनी १५ दिवसांत विशेष शिबिरे भरवून नोंदणी प्रक्रिया पूर्ण करून घ्यावी. तसेच नव्याने संलग्न झालेल्या महाविद्यालयांशी संपर्क साधून त्यांची नोंदणी करून घेण्याचे निर्देश देण्यात आले आहेत.
महाविद्यालयांनी पोर्टलवर भरलेली माहिती आणि विद्यापीठांकडील विद्यार्थी व शिक्षकांची संख्या यात तफावत नसणे आवश्यक आहे. प्राचार्यांकडून अचूक माहिती अपलोड केल्याचे प्रमाणपत्र मिळाल्यानंतरच नोडल कार्यालयाकडून ‘ना-हरकत प्रमाणपत्र’ (NOC) दिले जाईल. या प्रक्रियेत दिरंगाई किंवा दुर्लक्ष झाल्यास संबंधित नोडल अधिकारी आणि प्राचार्यांवर थेट कारवाई केली जाईल, असा सडेतोड इशारा संचालनालयाने दिला आहे.
