SPPU विद्यापीठाच्या नाशिक उपकेंद्रच्या उद्घाटनाचा मुहूर्त ठरला; मुख्यमंत्र्यांच्या हस्ते उद्घाटन
राज्याचे मुख्यमंत्री देवेंद्र फडणवीस यांच्या हस्ते येत्या २८ ऑगस्ट रोजी उपकेंद्राचे उद्घाटन होणार आहे. तब्बल १४ वर्षांनी स्वतंत्र इमारतीमध्ये सुरू झालेल्या विद्यापीठाच्या नाशिक उपकेंद्राच्या उद्घाटनाला मुहूर्त मिळाला आहे.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या नाशिक उपकेंद्राच्या उद्घाटनाचा अखेर मुहूर्त ठरला आहे. राज्याचे मुख्यमंत्री देवेंद्र फडणवीस यांच्या हस्ते येत्या २८ ऑगस्ट रोजी उपकेंद्राचे उद्घाटन होणार आहे. तब्बल १४ वर्षांनी स्वतंत्र इमारतीमध्ये सुरू झालेल्या विद्यापीठाच्या नाशिक उपकेंद्राच्या उद्घाटनाला मुहूर्त मिळाला आहे. त्यामुळे नाशिक येथील व्यवस्थापन परिषद सदस्य, अधिसभा सदस्य, प्राचार्य, प्राध्यापक व विद्यार्थ्यांमध्ये आनंदाचे वातावरण आहे.
पुणे विद्यापीठाच्या कार्यक्षेत्रातील नाशिक व अहिल्यानगर जिल्ह्यात स्वतंत्र उपकेंद्र असावीत याबाबत अनेक वेळा मागणी झाली. त्यावर सुरूवातीला जागा भाडेतत्वावर घेऊन हे उपकेंद्र कार्यान्वित झाले. मात्र, सुमारे २०१२ पासून स्वतंत्र जागेत सुसज्ज इमारत उभारून विद्यापीठाचे उपकेंद्र सुरू करण्याच्या दृष्टीने खऱ्या अर्थाने सुरूवात झाली. तत्कालीन अधिसभा सदस्य व विद्यार्थी संघटनांचे प्रतिनिधी यांनी वारंवार याबाबत मागणी केलीत्यानंतर शासनाने उपकेंद्रासाठी जागा उपलब्ध करून दिली. विद्यापीठाने निधीची तरतूद करून काही वर्षापूर्वी सुसज्ज इमारत उभी करण्यात आली. आता या उपकेंद्राचे उद्घाटन मुख्यमंत्री देवेंद्र फडणवीस, राज्याचे उच्च व तंत्र शिक्षण मंत्री चंद्रकांत पाटील, शालेय शिक्षण मंत्री दादा भुसे, मंत्री गिरीश महाजन व मंत्री छगन भुजबळ यांच्या उपस्थितीत येत्या २८ ऑगस्ट रोजी उपकेंद्राचे उद्घाटन पार पडणार आहे, असे नाशिक येथील अधिकार मंडळाच्या सदस्यांकडून सांगितले जात आहे.
विद्यापीठाच्या उपकेंद्राची इमारत गेल्या अनेक महिन्यापासून पूर्ण झाली होती. प्रमुख पाहुणे यांची वेळ मिळत नसल्याने त्यास काहीसा विलंब झाला होता. मात्र, विद्यापीठाने उपकेंद्रात नवनवीन अभ्यासक्रम सुरू केले आहेत. त्यामुळे येथे विद्यार्थी संख्या वाढेल. तसेच नाशिक उपकेंद्रात विद्यार्थ्यांचे प्रशासकीय प्रश्न अधिक तत्परतेने सुटतील, अशी अपेक्षा व्यक्त केली जात आहे.
----------------
गेल्या अनेक वर्षापासून प्रलंबित असलेल्या नाशिक उपकेंद्राला पूर्णत्व प्राप्त झाले आहे. याचा उपकेंद्र सुरू व्हावे म्हणून पाठपुरावा करणाऱ्या नाशिकमधील प्रत्येक आजी माजी सिनेट सदस्य, प्राचार्य, प्राध्यापक, विद्यार्थी संघटना यांना मनस्वी आनंद होत आहे. येत्या २८ ऑगस्ट रोजी मुख्यमंत्री देवेंद्र फडणवीस हे उपकेंद्राचे उद्घाटन करण्यासाठी येणार असल्याचे मुख्यमंत्री कार्यालयाकडून सांगण्यात आले आहे. त्यादृष्टीने नाशिककरांनी तयारी सुरू केली आहे.
- सागर वैद्य,व्यवस्थापन परिषद सदस्य, सावित्रीबाई फुले पुणे विद्यापीठ, पुणे
