सहावीच्या विद्यार्थिनीने तपासले बोर्डाचे दहावीचे पेपर; बोर्डाकडून गंभीर दाखल, चौकशी सुरू

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे इयत्ता दहावी बारावीच्या परीक्षा घेतल्या जात असून परीक्षा सुरू असतानाच शिक्षकांना उत्तर पत्रिका तपासणीचे काम दिले जाते. मात्र, सातारा जिल्ह्यातील फलटण तालुक्यातील विडणी येथील एका खासगी शाळेत इयत्ता सहावीची विद्यार्थिनी इयत्ता दहावीच्या बोर्डाच्या विद्यार्थ्यांच्या उत्तर पत्रिका तपासत असल्याचा व्हिडिओ व्हायरल झाला आहे. त्यावर शिक्षण विभागाचा जिल्हास्तरावरील अहवाल कोल्हापूर विभागीय मंडळाला प्राप्त झाला असून 13 मार्च रोजी कोल्हापूर विभागीय मंडळाचे अधिकारी संबंधित शाळेला भेट देऊन सीसीटीव्ही फुटेज तपासून ताब्यात घेणार आहेत. एकूणच घडलेल्या प्रकारामुळे बोर्डाच्या विद्यार्थ्यांचे भविष्य धोक्यात असल्याचे बोलले जात आहे.

कोल्हापूर विभागीय मंडळाचे अध्यक्ष राजेश क्षीरसागर म्हणाले, फलटण तालुक्यातील विडणी येथील उत्तरेश्वर हायस्कूलमध्ये हा प्रकार घडला असल्याची माहिती समोर आले आहे. एक शिक्षक त्याला परीक्षेचे सुपरव्हिजनचे काम नसताना संबंधित ठिकाणी बसला होता. तसेच इयत्ता सहावीची विद्यार्थिनी तेथे उत्तरपत्रिका तपासात असल्याचा व्हिडिओ आढळून आला. मागील आठवड्यातच जिल्हास्तरावरून विभागीय मंडळ स्तराकडे या संदर्भातील अहवाल प्राप्त झाला आहे. कोल्हापूर विभागीय मंडळाचे अधिकारी १३ मार्च रोजी संबंधित शाळेला भेट देऊन प्रत्यक्षात घडलेल्या घटनेची तपासणी करून सीसीटीव्ही फुटेज ताब्यात घेणार आहेत. उत्तर पत्रिका तपासण्याचे काम गोपनीय असून अशा ठिकाणी विद्यार्थ्यांना उत्तरपत्रिका हाताळण्यास देणे चुकीचे आहे. त्यामुळे या सर्व प्रकाराची गंभीर दखल घेऊन चौकशी अंतिम योग्य कारवाई केली जाईल. 

इयत्ता दहावी बारावीच्या पेपर फुटीच्या घटना समोर येत असताना झालेले पेपर शिक्षकांऐवजी विद्यार्थी तपासात असल्यामुळे एकच खळबळ उडाली आहे. संबंधित शिक्षक हा या विद्यार्थिनींकडून उत्तर पत्रिकेतील कोऱ्या पानांवर रेषा मारून घेत असल्याचे बोलले जात आहे. परंतु, या पद्धतीचे काम सुद्धा विद्यार्थ्यांना देणे योग्य नाही.त्यामुळे संबंधित शिक्षकाला कारवाईस सामोरे जावे लागणार आहे.

----------------------------------------

सदरची तक्रार मागील आठवड्यात प्राप्त झाली होती त्याची दखल घेण्यात आली असून या तक्रारीच्या अनुषंगाने सातारा जिल्हास्तरीय समितीने दिनांक 9 मार्च रोजी समक्ष भेट देऊन शिक्षण अधिकारी माध्यमिक यांच्यामार्फत प्राथमिक अहवाल सादर केला आहे.
विभागीय मंडळ स्तरावरील अधिकारी उद्या दिनांक 13 रोजी येथे भेट देऊन सखोल चौकशी करणार आहेत, तसेच सीसीटीव्ही फुटेज ताब्यात घ्यावयाचे आहे. तातडीने चौकशी पूर्ण करून कारवाई करण्यात येईल. (तक्रारीत दहावीच्या नव्हे तर सहावीच्या विद्यार्थिनींनी असे म्हटलेले आहे.)

-राजेश क्षीरसागर,
विभागीय अध्यक्ष, कोल्हापूर मंडळ