विद्यापीठातील विद्यार्थ्यांवर उपासमारीची वेळ; मेस चालक,उपहारगृह चालक गॅसच्या तुटवड्यामुळे हैराण 

एज्युवार्ता न्यूज नेटवर्क 

इराण, इजराइल-अमेरिका यांच्यातील युद्धामुळे निर्माण झालेल्या गॅसच्या तुटवड्याने सर्वसामान्य नागरिकांसह हॉटेल व मेस चालक आणि  उपहारगृह चालक अडचणीत सापडले आहेत. सावित्रीबाई फुले पुणे विद्यापीठातील विद्यार्थ्यांना सुद्धा त्याचा फटका बसण्यास सुरुवात झाली आहे. गॅस मिळत नसल्याने विद्यार्थ्यांना मेस मध्ये जेवण तयार करून देणे शक्य नसल्याचे हॉटेलमधील मेस चालक व उपहारगृह चालक विद्यापीठाच्या प्रशासनातील अधिकाऱ्यांना सांगत आहेत. त्यामुळे आता चुलीवर जेवण तयार करावे लागणार असल्याचे बोलले जात आहे.

सावित्रीबाई फुले पुणे विद्यापीठातील विविध वसतीगृहांमध्ये राहणाऱ्या विद्यार्थ्यांची संख्या मोठी आहे. त्याचप्रमाणे विद्यापीठातील रिफेक्ट्रीमध्ये जेवण करण्यासाठी येणाऱ्या विद्यार्थ्यांची संख्या सुद्धा मोठी असते. परंतु, संपूर्ण महाराष्ट्रातच नव्हे तर देशभरात विविध ठिकाणी गॅसचा तुटवडा निर्माण झाला आहे. गेल्या दोन दिवसांपासून हॉटेल चालकांनी मर्यादित अन्नपदार्थ तयार करण्यास सुरुवात केली असून अन्नपदार्थांचे दर सुद्धा वाढवले आहेत. स्वयंपाकासाठी गॅसच उपलब्ध झाला नाही तर अन्नपदार्थ कसे तयार करणार ? असा प्रश्न निर्माण झाला आहे. 

विद्यापीठातील विविध वसतिगृहात मेस चालवणाऱ्या मेस चालकांनी विद्यापीठाच्या प्रशासनाशी याबाबत संपर्क साधला आहे. गॅस मिळत नसल्याने विद्यार्थ्यांना अन्नपदार्थ तयार करून देणे शक्य नसल्याचे त्यांच्याकडून सांगितले जात आहे. विद्यापीठात असणाऱ्या फूड मॉलमध्ये काही दुकानदारांनी गॅस उपलब्ध नसल्याने पुढील काळात अन्नपदार्थ तयार करून देणे शक्य नसल्याचे विद्यापीठाला कळविले आहे. या सर्व घटनांमुळे विद्यापीठातील विद्यार्थ्यांना पुढील काळात उपासमारीची वेळ येऊ शकते. त्यामुळे विद्यापीठ प्रशासनाने या घटनेची वेळीच गंभीर दखल घेऊन त्यावर उपाययोजना करणे गरजेचे आहे, असे बोलले जात आहे.