SPPU बोगस डीग्री प्रकरण: विद्यार्थी बाबुरावजी घोलप कॉलेजचा; बोगस डिग्री दिली वाडिया कॉलेजची
मुळात ज्यांच्या नावे बोगस डीग्री तयार केली तो विद्यार्थी हा पुण्यातील सांगवीतील बाबूरावजी घोलप कॉलेजचा विद्यार्थी आहे. मात्र, त्याला बोगस गुणपत्रिका व डीग्री वाडिया कॉलेजची देण्यात आली.
Eduvarta
एज्युवार्ता न्यूज नेटवर्क
नीट पेपर फोडून जास्त गुण मिळण्याच्या हव्यासाने देशातील 21 विद्यार्थ्यांचा बळी घेतला. त्यावर देशभर आंदोलन पेटले अन् शेवटी शिक्षण मंत्री धर्मेंद्र प्रधान यांना राजीनामा द्यावा लागला. पैसे देऊन नीटचा पेपर विकत घेणे जसा गुन्हा आहे तसाच सावित्रीबाई फुले पुणे विद्यापीठाची बनावट डिग्री तयार करून ती विकणे आणि पैसे देऊन ती विकत घेणे हा सुद्धा गुन्हाच आहे. मात्र, प्रथमतः रमेश मुखेकर यांच्यासह बनावट डिग्री तयार करून त्याचा बाजार मांडणाऱ्यांचा शोध घेऊन त्यांना कडक शिक्षा झाली पाहिजे.मुळात ज्यांच्या नावे बोगस डीग्री तयार केली तो विद्यार्थी हा पुण्यातील सांगवीतील बाबूरावजी घोलप कॉलेजचा विद्यार्थी आहे. मात्र, त्याला बोगस गुणपत्रिका व डीग्री वाडिया कॉलेजची देण्यात आली.
सावित्रीबाई फुले पुणे विद्यापीठाच्या वित्त व लेखा विभागातील सहाय्यक कक्षाधिकारी रमेश मुखेकर याने एका रिक्षा चालकाला बाबत डिग्री सर्टिफिकेट आणि गुणपत्रिका दिल्याची धक्कादायक माहिती समोर आली. प्रथमदर्शनी मुखेकरने गुन्हा केल्याचे स्पष्टपणे दिसून येते.विद्यापीठाने या प्रकरणाची चौकशी करण्यासाठी सत्यशोधन समिती स्थापन केली आहे. बुधवारी सकाळी 11.30 वाजता महेश कदम यांना म्हणणे मांडण्यासाठी बोलावले आहे. त्यानंतर सर्व काही समोर येईल. मात्र, सुमारे एक महिन्यापूर्वी विद्यापीठाकडे तक्रार देऊनही त्यावर विद्यापीठाने काहीही कारवाई केली नाही, हे अनालकनिय आहे.विद्यापीठाची बनावट प्रमाणपत्र तयार केली जात असल्याचे समोर आल्याने विद्यापीठाने तात्काळ पोलिसांकडे तक्रार करणे अपेक्षित होते.विद्यापीठाची या प्रकरणात चूक झाली तशी रिक्षाचालक आणि पालक महेश कदम यांची सुध्दा चूक झाली.
विद्यार्थी साहिल महेश कदम याने बाबूरावजी घोलप कॉलेजमधून प्रथम वर्षांचे शिक्षण घेतले.त्यानंतर तो एका ठिकाणी काम करू लागला. मुलाने पुढे शिकावे असे पालक महेश कदम यांना वाटले. दरम्यान त्यांची भेट विद्यापीठाचे कर्मचारी मुखेकर यांच्याशी झाली. मुखेकर यांनी त्यांना प्रलोभन दाखवले. त्या प्रलोभनाला कदम भुलले. कॉलेजमध्ये न जाता परीक्षा न देता गुणपत्रिका आणि डिग्री सर्टिफिकेट घेण्यासाठी महेश कदम तयार झाले. त्यासाठी तीन लाखाची मागणी केल्यावर दीड लाख रुपये देण्याची तयारी दर्शवली.एका दिवसात 50 हजार रूपये दिले. मुलगा घोलप कॉलेजमध्ये शिकलेला असताना त्याला वाडिया कॉलेजच्या नावे गुणपत्रिका मिळाल्यावर ते शांत राहिले. तीन वर्ष कॉलेजमध्ये जाऊन अभ्यासकरून परीक्षा देऊन उत्तीर्ण होणाऱ्या विद्यार्थ्यांना गुणपत्रिका मिळतात. कोणालाही फुकट मिळत नाहीत, याचा कदाचित अज्ञानापोटी त्यांना विसर पडला असावा.
वाडिया कॉलेजची गुणपत्रिका मिळली तेव्हा कदम यांची काही तक्रार नव्हती. डिग्री सर्टिफिकेट मिळाल्यावर मात्र त्यांना शंका आली. त्यावर आक्षेप घेतल्यावर पुणे विद्यापीठाऐवजी सावित्रीबाई फुले पुणे विद्यापीठाची डिग्री मिळायला हवी.कारण विद्यापीठाचे नाव बदलले आहे. त्यामुळे त्यांनी सावित्रीबाई फुले पुणे विद्यापीठाची डिग्री मिळवली. हे करत असताना विद्यापीठाची सुद्धा फसवणूक केली जात आहे, याचे अज्ञानापोटी त्यांना भान राहिले नाही. मुखेकर याने यापूर्वी इतरांना बोगस डिग्री मिळून दिल्याचे महेश कदम प्रसार माध्यमांशी बोलताना सांगतात. त्यामुळे मुखेकर यांच्याशी संपर्क साधला, असेही ते बोलून दाखवतात. यातून स्पष्ट होते की कदम यांचा हेतू शुद्ध नव्हता.
मुखेकर याने या गुणपत्रिका कोणाकडून तयार करून घेतल्या. त्यासाठी कोणता कागद वापरला. डीग्री सर्टिफिकेटवर माजी कुलगुरू डॉ. वासुदेव गाडे यांच्या सहीचा वापर केला. विद्यापीठाच्या लोगोचा गैरवापर केला.मुखेकर याने एकट्याने हे सर्व केले नाही तर त्याचे काही साथीदार यात असण्याची शक्यता आहे. त्यामुळे या सर्व प्रकरणाची सखोल चौकशी झाली पाहिजे.
_________________________________
मला प्रकरणाची माहिती समजताच मी विद्यापीठाकडे याबाबत तक्रार केली होती. मात्र,त्यावर निर्णय घेण्यास विद्यापीठाने एक महिन्याचा कालावधी लावला.मुखेकर हा एकटा आरोपी नाही तर त्याचे साथीदार यात असण्याची शक्यता आहे. त्यामुळे याबाबत पोलिसांकडे तक्रार देऊन सर्वांची सखोल चौकशी करावी,अशी मागणी केली जाणार आहे.
डॉ. धम्मरत्न गायकवाड युवक अध्यक्ष, रिपब्लिकन पार्टी ऑफ इंडिया, पीसीएमसी
