थेट द्वितीय वर्ष अभियांत्रिकी प्रवेशासाठी नोंदणी सुरू; १९ जुलैपर्यंत मुदत
विद्यार्थ्यांनी ऑनलाइन नोंदणी करून अर्ज भरावा, आवश्यक कागदपत्रे अपलोड करावीत आणि अर्ज सादर करावा. 'ई-स्क्रुटिनी' (E-Scrutiny) पर्याय निवडल्यास अर्जाची पडताळणी ऑनलाइन होणार असून विद्यार्थ्यांना प्रत्यक्ष उपस्थित राहण्याची आवश्यकता नाही.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षातर्फे शैक्षणिक वर्ष २०२६-२७ साठी अभियांत्रिकी पदवी अभ्यासक्रमाच्या थेट द्वितीय वर्ष (Direct Second Year B.E./B.Tech) प्रवेश प्रक्रियेला सुरुवात झाली आहे. इच्छुक विद्यार्थ्यांना येत्या १९ जुलै २०२६ रोजी सायंकाळी ५ वाजेपर्यंत ऑनलाइन नोंदणी करता येणार आहे.अभियांत्रिकी व तंत्रज्ञान विषयातील पदविका (Diploma), बी.एस्सी. (B.Sc.) किंवा डिप्लोमा इन व्होकेशनल (D.Voc.) उत्तीर्ण होऊन प्रवेशासाठी पात्र असलेल्या विद्यार्थ्यांनी केंद्रीभूत प्रवेश प्रक्रियेत सहभागी होण्याचे आवाहन सीईटी कक्षाने केले आहे.
एआयसीटीई (AICTE) अथवा केंद्र अथवा राज्य शासन मान्यताप्राप्त संस्थेतून अभियांत्रिकी व तंत्रज्ञान क्षेत्रातील कोणत्याही शाखेतील किमान तीन वर्षांचा किंवा दोन वर्षांचा (Lateral Entry) पदविका अभ्यासक्रम किमान ४५ टक्के गुणांसह उत्तीर्ण असणे आवश्यक आहे. महाराष्ट्रातील राखीव प्रवर्ग, आर्थिकदृष्ट्या दुर्बल घटक (EWS) आणि दिव्यांग उमेदवारांसाठी किमान ४० टक्के गुणांची अट लागू राहील.
गणित विषयासह उच्च माध्यमिक (HSC) उत्तीर्ण होऊन बी.एस्सी. पदवीमध्ये किमान ४५ टक्के (राखीव प्रवर्गासाठी ४० टक्के) गुण मिळविलेले विद्यार्थी तसेच शासनमान्य तीन वर्षांचा डिप्लोमा इन व्होकेशनल (D.Voc.) अभ्यासक्रम पूर्ण केलेले विद्यार्थीही या प्रवेशासाठी पात्र असतील.
विद्यार्थ्यांनी ऑनलाइन नोंदणी करून अर्ज भरावा, आवश्यक कागदपत्रे अपलोड करावीत आणि अर्ज सादर करावा. 'ई-स्क्रुटिनी' (E-Scrutiny) पर्याय निवडल्यास अर्जाची पडताळणी ऑनलाइन होणार असून विद्यार्थ्यांना प्रत्यक्ष उपस्थित राहण्याची आवश्यकता नाही. मात्र 'फिजिकल स्क्रुटिनी' (Physical Scrutiny) पर्याय निवडणाऱ्या विद्यार्थ्यांना जवळच्या पडताळणी केंद्रावर प्रत्यक्ष जाऊन कागदपत्रांची पडताळणी करून घ्यावी लागेल.
प्रवेश प्रक्रियेचे वेळापत्रक
ऑनलाइन नोंदणी व कागदपत्रे अपलोड : ७ ते १९ जुलै २०२६ (सायं. ५ वाजेपर्यंत)
अर्ज पडताळणी (ई-स्क्रुटिनी/प्रत्यक्ष) : ८ ते २० जुलै २०२६ (सायं. ५ वाजेपर्यंत)
तात्पुरती गुणवत्ता यादी : २२ जुलै २०२६
तक्रारी सादर करण्याची मुदत : २३ ते २५ जुलै २०२६ (सायं. ५ वाजेपर्यंत)
अंतिम गुणवत्ता यादी : २७ जुलै २०२६
सीईटी कक्षाच्या माहितीनुसार, शैक्षणिक वर्ष २०२५-२६ मध्ये थेट द्वितीय वर्ष अभियांत्रिकी प्रवेशासाठी ५९ हजार ४६ विद्यार्थ्यांनी नोंदणी केली होती. यंदाही मोठ्या प्रमाणावर विद्यार्थ्यांचा प्रतिसाद अपेक्षित असून प्रवेश प्रक्रियेबाबतची अद्ययावत माहिती सीईटी कक्षाच्या अधिकृत संकेतस्थळावर उपलब्ध आहे.
