OBC-VJNT विद्यार्थ्यांच्या शिष्यवृत्तीचा प्रश्न पेटला; स्पॉट राऊंडच्या विद्यार्थ्यांना लाभ देण्याची मागणी
अखिल भारतीय विद्यार्थी परिषद (ABVP) आक्रमक झाली असून पुण्यात विद्यार्थ्यांच्या वतीने उपोषण आंदोलन करण्यात येत आहे. स्पॉट राऊंडमधून प्रवेश घेतलेल्या पात्र विद्यार्थ्यांनाही शिष्यवृत्तीचा लाभ मिळावा, अशी प्रमुख मागणी आंदोलकांनी केली आहे.
Eduvarta
एज्युवार्ता न्यूज नेटवर्क
केंद्रीय प्रवेश प्रक्रिया (CAP) पूर्ण झाल्यानंतर रिक्त जागांवर स्पॉट राऊंडमधून प्रवेश घेतलेल्या OBC, VJNT आणि संबंधित मागास प्रवर्गातील विद्यार्थ्यांच्या शिष्यवृत्तीचा प्रश्न पुन्हा ऐरणीवर आला आहे. या विद्यार्थ्यांना शिक्षण शुल्क व परीक्षा शुल्काच्या शिष्यवृत्तीपासून वंचित ठेवण्याच्या निर्णयाविरोधात अखिल भारतीय विद्यार्थी परिषद (ABVP) आक्रमक झाली असून पुण्यात विद्यार्थ्यांच्या वतीने उपोषण आंदोलन करण्यात येत आहे. स्पॉट राऊंडमधून प्रवेश घेतलेल्या पात्र विद्यार्थ्यांनाही शिष्यवृत्तीचा लाभ मिळावा, अशी प्रमुख मागणी आंदोलकांनी केली आहे.
महाराष्ट्राच्या MahaDBT प्रणालीवर इतर मागास बहुजन कल्याण विभागांतर्गत OBC आणि VJNT विद्यार्थ्यांसाठी शिक्षण शुल्क व परीक्षा शुल्काशी संबंधित योजना उपलब्ध आहेत. अधिकृत माहितीनुसार, व्यावसायिक अभ्यासक्रमातील पात्र OBC विद्यार्थ्यांना CAP प्रक्रियेतून प्रवेश घेतल्यास नियमानुसार शुल्काचा लाभ दिला जातो. VJNT विद्यार्थ्यांसाठीही व्यावसायिक अभ्यासक्रमातील CAP प्रवेशासंदर्भात शिक्षण शुल्क व परीक्षा शुल्काच्या परतफेडीची तरतूद नमूद आहे. त्यामुळे CAPच्या नियमित फेऱ्यांनंतर रिक्त जागांवर प्रवेश घेतलेल्या विद्यार्थ्यांच्या पात्रतेचा प्रश्न निर्माण झाला असून, याबाबत स्पष्टता आणि शिष्यवृत्तीचा लाभ देण्याची मागणी पुढे आली आहे.
अभाविपच्या म्हणण्यानुसार, प्रवेश प्रक्रिया आणि शिष्यवृत्तीच्या नियमांमध्ये असलेल्या या फरकाचा थेट आर्थिक फटका विद्यार्थ्यांना बसत आहे. अनेक विद्यार्थ्यांनी प्रवेश मिळाल्यानंतर शिक्षण सुरू केले असून, शुल्क भरण्याची आर्थिक क्षमता मर्यादित असल्याने शिष्यवृत्ती हा त्यांच्या शिक्षणाचा महत्त्वाचा आधार असल्याचे संघटनेचे म्हणणे आहे. यापूर्वीही अभाविपने स्पॉट राऊंडमधून प्रवेश घेतलेल्या विद्यार्थ्यांना शिक्षण शुल्क शिष्यवृत्तीचा लाभ देण्याची मागणी शासनाकडे केली होती. सध्याच्या आंदोलनातून या निर्णयाचा पुनर्विचार करून पात्र विद्यार्थ्यांना शिष्यवृत्ती लागू करण्याची मागणी करण्यात आली आहे.
दरम्यान, राज्यातील विविध व्यावसायिक अभ्यासक्रमांच्या प्रवेश प्रक्रियेत CAPच्या माध्यमातून प्रवेशासाठी अधिकृत वेळापत्रक आणि नियम CET Cellकडून जाहीर केले जातात. २०२६-२७च्या प्रवेश प्रक्रियेतही विविध अभ्यासक्रमांसाठी CAP फेऱ्या सुरू आहेत. OBC, VJ/DT, NT(A), NT(B), NT(C), NT(D), SBC आणि इतर प्रवर्गांच्या विद्यार्थ्यांना जात वैधता व नॉन-क्रिमी लेयरसारखी कागदपत्रे सादर करण्यासंदर्भात नियम लागू आहेत. त्यामुळे स्पॉट राऊंडमधून प्रवेश घेतलेल्या विद्यार्थ्यांच्या शिष्यवृत्तीबाबत शासनाने स्पष्ट निर्णय घ्यावा आणि पात्र विद्यार्थ्यांचे आर्थिक नुकसान होऊ नये, अशी मागणी आंदोलनातून करण्यात येत आहे.
