NEET UG 2026 परीक्षा शुल्क परताव्याची सुविधा सुरू
उमेदवारांनी त्यांच्या लॉगिन आयडी आणि पासवर्डचा वापर करून NEET (UG)-2026 नोंदणी पोर्टलमध्ये लॉगिन करावे आणि “Refund” लिंकवर क्लिक करून परतावा पोर्टल उघडावे.
eduvarta@gmail.com 
एज्युवार्ता न्यूज नेटवर्क
नॅशनल टेस्टिंग एजन्सी (NTA) ने NEET (UG)-2026 उमेदवारांच्या परीक्षा शुल्क परताव्यासंदर्भात महत्त्वाची माहिती जाहीर केली आहे. 12 मे 2026 रोजी प्रसिद्ध करण्यात आलेल्या सार्वजनिक सूचनेच्या पुढील अनुषंगाने, उमेदवारांना परीक्षा शुल्क परताव्यासाठी आवश्यक बँक खाते तपशील सादर करण्यासाठी NEET (UG)-2026 नोंदणी पोर्टलवर विशेष सुविधा उपलब्ध करून देण्यात आली आहे. बँक खाते तपशील सादर करण्याची ही सुविधा 22 मे 2026 पासून सुरू झाली असून 27 मे 2026 रोजी रात्री 11:50 वाजेपर्यंत उपलब्ध राहणार आहे.
उमेदवारांनी त्यांच्या लॉगिन आयडी आणि पासवर्डचा वापर करून NEET (UG)-2026 नोंदणी पोर्टलमध्ये लॉगिन करावे आणि “Refund” लिंकवर क्लिक करून परतावा पोर्टल उघडावे. या पोर्टलवर उमेदवारांना त्यांच्या पसंतीच्या बँक खात्याचे तपशील भरता येणार आहेत. बँक खात्याची माहिती अचूक राहावी यासाठी इच्छुक उमेदवारांना रद्द केलेला धनादेश (Cancelled Cheque) अपलोड करण्याची सुविधाही देण्यात आली आहे.
NTA ने स्पष्ट केले आहे की उमेदवारांनी एकदा बँक तपशील सादर केल्यानंतर ते अंतिम मानले जातील आणि त्यामध्ये पुढील कोणताही बदल करता येणार नाही. उमेदवारांनी परिशिष्ट-I (Annexure-I) मध्ये नमूद करण्यात आलेली सर्व माहिती काळजीपूर्वक भरावी, असे आवाहन करण्यात आले आहे.
दरम्यान, NTA ने उमेदवारांना कोणत्याही प्रकारचा “Chargeback” सुरू न करण्याचा सल्ला दिला आहे. शुल्क परताव्याची प्रक्रिया अधिकृत पद्धतीने करण्यात येणार असल्याचेही संस्थेकडून स्पष्ट करण्यात आले आहे.
