दहावीचा निकाल कमी लागलेल्या शाळांचे अनुदान बंद? झेडपी शाळांची गुणवत्ता वाढली
पुणे जिल्हा परिषदेच्या ८० टक्क्यांहून कमी निकाल लागणाऱ्या माध्यमिक शाळांच्या गुणवत्ता वाढीसाठी जिल्हा परिषदेच्या वतीने विशेष मोहीम राबविण्यात आली.
Eduvarta
राहुल शिंदे
काही दिवसांपूर्वी जाहीर झालेल्या इयत्ता दहावीच्या निकालाचे (SSC Result) अवलोकन केल्यानंतर पुणे जिल्हा परिषदेच्या (Pune Zilla Parishad) माध्यमिक शाळांच्या (ZP schools) गुणवत्तेत वाढ झाली असल्याची सकारात्मक बाब समोर आली आहे. मात्र, शासनाकडून अनुदान (Government Aided Schools) मिळूनही जिल्हा परिषदेच्या कार्यक्षेत्रातील २२ शाळांचा निकाल ८० टक्क्यांपेक्षा कमी लागला आहे. त्यामुळे आपले अनुदान का थांबवू नये अशी नोटीस संबंधित शाळांना बजावली जाणार आहे, असे जिल्हा परिषदेचे मुख्य कार्यकारी अधिकारी आयुष प्रसाद (Ayush Prasad) यांनी 'एज्युवार्ता' शी बोलताना सांगितले.
पुणे जिल्हा परिषदेच्या ८० टक्क्यांहून कमी निकाल लागणाऱ्या माध्यमिक शाळांच्या गुणवत्ता वाढीसाठी जिल्हा परिषदेच्या वतीने विशेष मोहीम राबविण्यात आली. त्यात संबंधित शाळेला कमी पडणारे शिक्षक देण्याबरोबरच इतरही आवश्यक सोयी सुविधा उपलब्ध करून देण्यात आल्या. त्यामुळे ८० टक्के निकाल लागणा-या शाळांची संख्या यंदा ७९ वरून २२ वर आली. तसेच ८० ते ९० टक्के निकाल लागणाऱ्या शाळांची संख्या ७७ वरून १७६ झाली. मात्र गेल्या वर्षाच्या तुलनेत ९० टक्क्यांहून अधिक निकाल लागणाऱ्या शाळांच्या संख्येत ५५ ने घट झाली.
व्यसनी शिक्षकांनो खबरदार! शिक्षणमंत्री दीपक केसरकर यांनी केली मोठी घोषणा, लवकरच परिपत्रक काढणार
शिक्षण क्षेत्रात नेहमीच खाजगी व जिल्हा परिषदेच्या शाळांमध्ये तुलना केली जाते. मात्र गेल्या काही वर्षांपासून जिल्हा परिषदेच्या शाळांच्या गुणवत्तेत वाढ होताना दिसत आहे. त्याचप्रमाणे शाळांमध्ये राबविल्या जाणाऱ्या उपक्रमामुळे अनेक शाळा राज्याच्याच नाही तर देशाच्या नकाशावर आल्या आहेत. इयत्ता दहावीच्या निकालात जिल्हा परिषदेच्या शाळांनी केलेली उल्लेखनीय कामगिरी सकारात्मक असून त्यामुळे ग्रामीण भागातील विद्यार्थ्यांच्या शैक्षणिक गुणवत्ता वाढीसाठी पोषक वातावरण निर्माण झाल्याचे दिसून येत आहे.
'त्या' शाळांकडे विशेष लक्ष
पुणे जिल्हा परिषदेनेतर्फे वर्षभरापूर्वी ८० टक्क्यांपेक्षा कमी निकाल लागणाऱ्या शाळांकडे विशेष लक्ष देण्यात आले होते. त्यामुळे या शाळांचा निकाल वाढला आहे. केवळ 22 शाळा ८० टक्क्यांच्या खाली आहेत. या शाळांना तुमचे अनुदान बंद का करू नये ?अशी नोटीस बजावली जाणार आहे. तसेच शंभर टक्के निकाल लागणाऱ्या शाळांची संख्या कमी का झाली? याचाही आढावा घेतला जाणार आहे. तसेच शाळेच्या गुणवत्ता वाढीसाठी यापुढील काळातही विविध उपाय योजना केल्या जाणार आहेत.
- आयुष प्रसाद, मुख्य कार्यकारी अधिकारी, जिल्हा परिषद, पुणे
जिल्हा परिषदेच्या इयत्ता दहावीच्या शाळांची संख्या
२०२२ - १ हजार ५८२
२०२३ - १ हजार ५२९
८० टक्क्यांपेक्षा कमी निकाल लागलेल्या शाळांची संख्या
२०२२ - ७९
२०२३ - २२
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
