SPPU: डॉ.राजेंद्र तलवारे यांनी स्वीकारला परीक्षा विभागाच्या संचालक पदाचा पदभार
पूर्णवेळ संचालक पदाची भरती प्रक्रिया राबविण्यात आल्यानंतर सुमारे महिना भरापूर्वी डॉ.राजेंद्र तलवारे यांची संचालक पदी निवड करण्यात आली
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या परीक्षा व मूल्यमापन मंडळाच्या संचालक पदाचा पदभार डॉक्टर राजेंद्र तलवारे यांनी आज (दि.6) स्वीकारला. त्यामुळे उशीरा का होईना विद्यापीठाला पूर्णवेळ परीक्षा नियंत्रक मिळाले आहेत. त्यामुळे प्रलंबित निकाल, पीआरएन ब्लॉक विद्यार्थ्यांचा रखडलेला प्रश्न अशा अनेक विषयांवर लवकर निर्णय घेतले जातील, अशी अपेक्षा व्यक्त केली जात आहे.
सावित्रीबाई फुले पुणे विद्यापीठाचे माजी परीक्षा व मूल्यमापन मंडळाचे संचालक डॉ.महेश काकडे यांचा कार्यकाल संपल्यानंतर सुमारे एक वर्षाहून अधिक कालावधीपासून विद्यापीठाच्या परीक्षा विभागाच्या संचालक पदाची जबाबदारी डॉ. प्रभाकर देसाई यांच्याकडे देण्यात आली होता. पूर्णवेळ संचालक पदाची भरती प्रक्रिया राबविण्यात आल्यानंतर सुमारे महिना भरापूर्वी डॉ.राजेंद्र तलवारे यांची संचालक पदी निवड करण्यात आली.
डॉ. तलवारे हे मुबई येथील रतन टाटा कौशल्य विद्यापीठात कार्यरत होते. तसेच विद्यापीठाच्या परीक्षा विभागात आणि व्हीआयटी कॉलेजमध्ये त्यांनी यापूर्वी काम केले आहे. आता परीक्षा व मूल्यमापन मंडळाच्या संचालक पदाची पूर्णवेळ जबाबदारी त्यांच्याकडे देण्यात आली आहे. विद्यापीठाचे प्रभारी कुलसचिव डॉ.प्रफुल्ल पवार यांनी पुष्पगुच्छ देऊन त्यांचे स्वागत केले.
राष्ट्रीय शैक्षणिक धोरणानुसार परीक्षांचे आयोजन करणे, 45 दिवसांच्या आत निकाल लावणे, विविध कारणांमुळे अनेक दिवसांपासून रखडलेल्या निकाला संदर्भात निर्णय घेणे, सत्र पूर्तता संपुष्टात आल्यामुळे पीआरएन क्रमांक ब्लॉक झालेल्या विद्यार्थ्यांच्या परीक्षेबाबत निर्णय घेणे ,अशा अनेक महत्त्वाच्या विषयांवर तलवारे यांना काम करावे लागणार आहे.
