अग्निवीरांसाठी मोठा दिलासा: ७५ टक्के जवानांना दोन वर्षांची मुदतवाढ, नियमित सैन्यात सामावण्याची नवी संधी
केंद्र सरकारने अग्निपथ योजनेअंतर्गत भरती झालेल्या अग्निवीरांसाठी एक महत्त्वपूर्ण निर्णय घेतला आहे. चार वर्षांची सेवा पूर्ण झाल्यानंतर नियमित सैन्यात निवड न झालेल्या ७५ टक्के अग्निवीरांना आता आणखी दोन वर्षे सेवा करण्याची संधी मिळणार आहे.
Eduvarta
एज्युवार्ता न्यूज नेटवर्क
केंद्र सरकारने अग्निपथ योजनेअंतर्गत भरती झालेल्या अग्निवीरांसाठी एक महत्त्वपूर्ण निर्णय घेतला आहे. चार वर्षांची सेवा पूर्ण झाल्यानंतर नियमित सैन्यात निवड न झालेल्या ७५ टक्के अग्निवीरांना आता आणखी दोन वर्षे सेवा करण्याची संधी मिळणार आहे. या अतिरिक्त कालावधीनंतर इच्छुक अग्निवीरांना वस्तुनिष्ठ निकषांच्या आधारे नियमित सशस्त्र दलात दाखल होण्याची संधी उपलब्ध होईल. चीफ ऑफ डिफेन्स स्टाफ जनरल एन. एस. राजा सुब्रमणी यांनी ही माहिती दिली.
जनरल राजा सुब्रमणी यांच्या म्हणण्यानुसार, केंद्रीय मंत्रिमंडळाने अग्निवीरांना भारतीय सशस्त्र दलात सामावून घेण्यासाठी नवी व्यवस्था तयार केली आहे. सुरुवातीच्या चार वर्षांची सेवा पूर्ण करणाऱ्या आणि नियमित सैन्यात न निवडल्या गेलेल्या अग्निवीरांना अतिरिक्त दोन वर्षे सेवेत राहता येईल. त्यानंतर सैन्यात पुढेही सेवा करू इच्छिणाऱ्यांची निवड निश्चित निकषांनुसार केली जाईल आणि पात्र ठरलेल्यांना नियमित दलात सामावून घेतले जाईल.
१४ जून २०२२ रोजी जाहीर झालेल्या अग्निपथ योजनेनुसार पहिली तुकडी आता चार वर्षांचा कालावधी पूर्ण करण्याच्या टप्प्यावर आहे. मूळ योजनेत फक्त २५ टक्के अग्निवीरांना गुणवत्तेच्या आधारे नियमित सैन्यात भरतीची संधी होती, तर उर्वरित ७५ टक्क्यांना नागरी जीवनात परत जावे लागत होते. नव्या निर्णयाने या ७५ टक्के अग्निवीरांना आणखी दोन वर्षे सेवा आणि त्यानंतर नियमित सैन्यात प्रवेशाची दुसरी संधी मिळाली आहे.
अग्निवीरांच्या कामगिरीचे चार वर्षांच्या कालावधीत सातत्याने मूल्यांकन करण्यात आले असून योजनेचाही वेळोवेळी आढावा घेण्यात आला आहे. अग्निवीरांच्या कामगिरीबाबत मिळालेला प्रतिसाद अत्यंत सकारात्मक असल्याचे जनरल राजा सुब्रमणी यांनी सांगितले. यामुळे चार वर्षांनंतर सेवा सोडावी लागणाऱ्या अग्निवीरांना नियमित सैन्यात दाखल होण्यासाठी आणखी एक संधी मिळणार आहे.
अंतिम निवड मात्र वस्तुनिष्ठ निकष आणि पात्रतेच्या आधारेच होईल. हा निर्णय अग्निवीरांच्या भविष्यासाठी दिलासादायक ठरला असून सशस्त्र दलातील तरुण जवानांच्या कारकिर्दीला नवी दिशा देणारा आहे.
