जूनपासून दुसरी, तिसरी, चौथी आणि सहावीसाठी नवीन अभ्यासक्रम लागू
येत्या जूनपासून सुरू होणाऱ्या शैक्षणिक सत्रापासून दुसरी, तिसरी आणि चौथीसोबतच सहावीचाही नवीन अभ्यासक्रम लागू केला जाणार आहे. राष्ट्रीय शैक्षणिक धोरणानुसार काठिण्यपातळी निश्चित करून अध्ययन निष्पत्तीवर आधारित हा अभ्यासक्रम तयार करण्यात आला आहे.
eduvarta@gmail.com 
एज्युवार्ता न्यूज नेटवर्क
इयत्ता दुसरी, तिसरी आणि चौथीच्या नवीन अभ्यासक्रम आराखड्याला मंजुरी दिल्यानंतर राज्य शिक्षण मंडळाच्या अभ्यासक्रमासाठीच्या राज्यस्तरीय सुकाणू समितीने इयत्ता सहावीच्या अभ्यासक्रम आराखड्याला मंजुरी दिली असल्याची माहिती शालेय शिक्षण मंत्री दादा भुसे यांनी दिली.
शालेय शिक्षण मंत्री दादा भुसे यांच्या अध्यक्षतेखाली महाराष्ट्र प्राथमिक शिक्षण परिषदेच्या कार्यालयात झालेल्या बैठकीत इयत्ता सहावीच्या अभ्यासक्रम आराखड्याला मंजुरी देण्यात आली. यावेळी शालेय शिक्षण राज्यमंत्री डॉ.पंकज भोयर, प्रधान सचिव रणजितसिंह देओल, आयुक्त सच्चिंद्रप्रताप सिंह, राज्य शिक्षण मंडळाचे अध्यक्ष त्रिगुण कुलकर्णी, राज्य शैक्षणिक संशोधन आणि प्रशिक्षण परिषदेचे (एससीईआरटी) संचालक डॉ.हेमंत वसेकर, बालभारतीच्या संचालक अनुराधा ओक, शिक्षण संचालक (माध्यमिक) महेश पालकर, शिक्षण संचालक (योजना) कृष्णकुमार पाटील यांच्यासह सुकाणू समितीचे सदस्य उपस्थित होते.
शालेय शिक्षण मंत्री दादा भुसे म्हणाले, येत्या जूनपासून सुरू होणाऱ्या शैक्षणिक सत्रापासून दुसरी, तिसरी आणि चौथीसोबतच सहावीचाही नवीन अभ्यासक्रम लागू केला जाणार आहे. राष्ट्रीय शैक्षणिक धोरणानुसार काठिण्यपातळी निश्चित करून अध्ययन निष्पत्तीवर आधारित हा अभ्यासक्रम तयार करण्यात आला आहे.
या आराखड्याला राज्य सुकाणू समितीकडून मंजुरी मिळाल्यानंतर तो अभ्यासक्रम समन्वय समितीकडे पाठवण्यात येणार आहे. अंतिम मंजुरीनंतर बालभारतीमार्फत नवीन पाठ्यपुस्तके तातडीने तयार करून ती नवीन शैक्षणिक सत्राच्या सुरुवातीपर्यंत उपलब्ध करून दिली जाणार आहेत.
दरम्यान, दुसरी, तिसरी आणि चौथीच्या अभ्यासक्रमासाठी शिक्षक प्रशिक्षण प्रक्रियेलाही सुरुवात करण्यात आली आहे. एससीईआरटीतर्फे राज्यस्तरीय मुख्य प्रशिक्षण याच महिन्यात आयोजित करण्यात येणार असून, त्यानंतर जिल्हास्तरावर शिक्षकांचे प्रशिक्षण पूर्ण करण्यात येणार असल्याची माहिती डॉ. वसेकर यांनी दिली.
