बी.फार्मसी थेट द्वितीय वर्ष प्रवेशासाठी नोंदणी सुरू; १८ जुलैपर्यंत अर्जाची मुदत
प्रवेश प्रक्रियेच्या वेळापत्रकानुसार अर्जाची ऑनलाइन नोंदणी व कागदपत्रे अपलोड करण्याची मुदत ८ ते १८ जुलैपर्यंत असून अर्ज पडताळणी व निश्चितीची प्रक्रिया ९ ते १९ जुलैदरम्यान होणार आहे. तात्पुरती गुणवत्ता यादी २१ जुलै रोजी प्रसिद्ध केली जाईल. त्यानंतर २२ ते २४ जुलैदरम्यान उमेदवारांना तक्रारी नोंदविण्याची संधी दिली जाईल.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षातर्फे शैक्षणिक वर्ष २०२६-२७ साठी तंत्रशिक्षण विभागांतर्गत पूर्णवेळ पदवी अभ्यासक्रमाच्या थेट द्वितीय वर्ष बी. फार्मसी (Direct Second Year B. Pharmacy) प्रवेश प्रक्रियेला सुरुवात झाली आहे. ऑनलाइन नोंदणी प्रक्रिया ८ जुलैपासून सुरू झाली असून अर्ज करण्याची अंतिम मुदत १८ जुलै २०२६ सायंकाळी ५ वाजेपर्यंत आहे.'फार्मसी कौन्सिल ऑफ इंडिया' (PCI) मान्यताप्राप्त संस्थेतून डी. फार्म. (D. Pharm.) अभ्यासक्रम उत्तीर्ण झालेल्या व पात्रता निकष पूर्ण करणाऱ्या विद्यार्थ्यांनी प्रवेश प्रक्रियेसाठी ऑनलाइन नोंदणी करण्याचे आवाहन सीईटी कक्षाने केले आहे.
प्रवेश प्रक्रियेसाठी उमेदवारांनी अधिकृत संकेतस्थळावर ऑनलाइन नोंदणी करून अर्ज भरावा, आवश्यक कागदपत्रे अपलोड करावीत आणि अर्ज सादर करावा. अर्ज पडताळणीसाठी उमेदवारांना ई-पडताळणी (E-Scrutiny) किंवा प्रत्यक्ष पडताळणी (Physical Scrutiny) या दोन पर्यायांपैकी एकाची निवड करता येणार आहे. ई-पडताळणीचा पर्याय निवडणाऱ्या विद्यार्थ्यांच्या अर्जांची ऑनलाइन पडताळणी संबंधित ई-पडताळणी केंद्रामार्फत केली जाईल. तर प्रत्यक्ष पडताळणीची निवड करणाऱ्या विद्यार्थ्यांना जवळच्या पडताळणी केंद्रावर उपस्थित राहावे लागणार आहे.
प्रवेश प्रक्रियेच्या वेळापत्रकानुसार अर्जाची ऑनलाइन नोंदणी व कागदपत्रे अपलोड करण्याची मुदत ८ ते १८ जुलैपर्यंत असून अर्ज पडताळणी व निश्चितीची प्रक्रिया ९ ते १९ जुलैदरम्यान होणार आहे. तात्पुरती गुणवत्ता यादी २१ जुलै रोजी प्रसिद्ध केली जाईल. त्यानंतर २२ ते २४ जुलैदरम्यान उमेदवारांना तक्रारी नोंदविण्याची संधी दिली जाईल. अंतिम गुणवत्ता यादी २७ जुलै रोजी संकेतस्थळावर प्रसिद्ध करण्यात येणार आहे.
दरम्यान, शैक्षणिक वर्ष २०२५-२६ मध्ये थेट द्वितीय वर्ष बी. फार्मसी प्रवेशासाठी १४ हजार ८८० विद्यार्थ्यांनी नोंदणी केली होती. प्रवेश प्रक्रियेबाबतची अद्ययावत माहिती आणि पुढील वेळापत्रकासाठी विद्यार्थ्यांनी सीईटी कक्षाच्या www.mahacet..org या अधिकृत संकेतस्थळाला नियमित भेट देण्याचे आवाहन करण्यात आले आहे.
