'आयसर'ला मिळणार केंद्र सरकारचे पाठबळ
डॉ. सुभास सरकार यांनी सोमवारी आयसरला भेट देऊन पाहणी केली आणि संस्थेच्या संचालकांशी विविध मुद्द्यांवर चर्चा केली.
eduvarta@gmail.com 
एज्युवार्ता न्यूज नेटवर्क
पुण्यातील भारतीय वैज्ञानिक शिक्षण आणि संशोधन संस्थेत (IISER) सुरु असलेल्या संशोधनात्मक कार्याबद्दल केंद्रीय शिक्षण राज्यमंत्री डॉ. सुभास सरकार (Dr. Subhash Sarkar) यांनी समाधान व्यक्त केले. केंद्र सरकारकडून (Central Government) या संस्थेला आवश्यक ते सर्व सहकार्य केले जाईल, अशी ग्वाही त्यांनी दिली आहे.
डॉ. सुभास सरकार यांनी सोमवारी आयसरला भेट देऊन पाहणी केली आणि संस्थेच्या संचालकांशी विविध मुद्द्यांवर चर्चा केली. संस्थेच्या संशोधन आणि विकास विभागाचे अधिष्ठाता प्रा. रंजन बॅनर्जी यांनी डॉ. सरकार यांचे पुष्पगुच्छ देऊन स्वागत केले. यावेळी संस्थेच्या अनेकविध उपक्रमांची त्याचबरोबर भावी वाटचालीविषयी डॉ. सरकार यांना सादरीकरणासह माहिती देण्यात आली. संस्थेचे विविध अधिष्ठाता आणि विभाग प्रमुख यावेळी झालेल्या चर्चेत सहभागी झाले होते.
शिक्षणविषयक ताज्या बातम्यांसाठी येथे क्लिक करा. http://eduvarta.com/
त्यानंतर डॉ. सरकार यांनी संस्थेमधील सर्वात वेगवान आणि अचूक काम करणाऱ्या परम ब्रम्हा या सुपर कॉम्प्युटरचीही पाहणी केली, त्याचबरोबर आण्विक चुंबकीय अनुनाद केंद्रालाही त्यांनी भेट देऊन कार्यप्रणाली समजावून घेतली. संस्थेमधील रसायनशास्त्र आणि जीवशास्त्र विभागाबरोबरच आरोग्य विज्ञान केंद्रालाही डॉ. सरकार यांनी यावेळी भेट दिली आणि सध्या सुरु असलेल्या संशोधन कार्याविषयी माहिती घेतली.
