स्वाधार योजनेचा लाभ घेण्यासाठी दोन दिवस शिल्लक, ३० नोव्हेंबरपर्यंत अर्ज  भरता येणार

एज्युवार्ता न्यूज नेटवर्क 

सामाजिक न्याय व विशेष साहाय्य विभागाकडून (Social Justice and Special Assistance Department) शासकीय वसतिगृहात प्रवेश न मिळालेल्या तसेच शासकीय वसतिगृहात प्रवेश न घेतलेल्या विद्यार्थ्यांपैकी अनुसूचित जाती व नवबौद्ध घटकांतील इयत्ता अकरावी, बारावीच्या विद्यार्थ्यांना स्वाधार योजनेचा लाभ देण्यात येतो. त्यासाठी पात्र उमेदवारांकडून डाॅ. बाबासाहेब आंबेडकर स्वाधार योजना २०२४-२५ (Swadhar Yojana 2024-25) करिता नवीन व नूतनीकरण अर्ज भरण्यास ३० नोव्हेंबरपर्यंत मुदत (Deadline for filing new and renewal applications is November 30th) देण्यात आली आहे. 

व्यावसायिक व बिगर व्यावसायिक अभ्यासक्रमांमध्ये प्रवेश मिळालेल्या विद्यार्थ्यांना पुढील शिक्षण घेता यावे म्हणून भोजन भत्ता, निवास भत्ता व निर्वाह भत्ता, तसेच इतर शैक्षणिक सुविधा डॉ. बाबासाहेब आंबेडकर स्वाधार योजनेमधून उपलब्ध करून देण्यात येतात. आयुक्त, समाज कल्याण, पुणे यांच्या ३१ जुलै २०२४ च्या परिपत्रकानुसार वसतिगृह प्रवेश व भारतरत्न डॉ. बाबासाहेब आंबेडकर स्वाधार योजना https://hmas.mahait.org या पोर्टलवर ऑनलाईन करण्यात आली आहे. 

विद्यार्थ्यांनी डॉ. बाबासाहेब आंबेडकर स्वाधार योजना २०२४-२५ साठी नवीन व नूतनीकरण अर्ज पोर्टलवर ३० नोव्हेंबर २०२४ पर्यंत सादर करणे आवश्यक आहे. ज्या विद्यार्थ्यांनी यापूर्वी स्वाधार योजनेचा अर्ज भरला नाही, अशा विद्यार्थ्यांनी ऑनलाईन पोर्टलवर अर्ज भरत असताना न्यू टॅबवर क्लिक करून आवश्यक कागदपत्रे अपलोड करणे आवश्यक आहे. ज्या विद्यार्थ्यांनी चालू अभ्यासक्रमासाठी मागील वर्षी स्वाधार योजनेचा लाभ घेतलेला आहे. ते विद्यार्थी नूतनीकरणासाठी पात्र होतात. अशा विद्यार्थ्यांनी २०२४ २५ करिता ऑनलाईन पोर्टलवर अर्ज भरत असताना न्यू ऐवजी एक्झिस्टिंग टॅबवर क्लिक करून आवश्यक कागदपत्रे अपलोड करावेत. तरी सर्व पात्र विद्यार्थ्यांनी डॉ. बाबासाहेब आंबेडकर स्वाधार योजना २०२४-२५ करिता नवीन व नूतनीकरण अर्ज ३० नोव्हेंबर २०२४ पर्यंत भरावेत.