वर्गात चालत आली अन् अचानक खाली पडली, शिक्षिका उचायला गेल्या अन् 9 वर्षीय विद्यार्थिनीचा मृत्यू
राजधानी दिल्लीतील माया विहार परिसरातील लवली हेरिटेज स्कूलमध्ये गुरुवारी सकाळी धक्कादायक घटना घडली. तिसरी इयत्तेत शिकणाऱ्या अवघ्या नऊ वर्षांच्या प्रगती नावाच्या विद्यार्थिनीचा शाळेत असतानाच अचानक मृत्यू झाला.
Eduvarta
एज्युवार्ता न्यूज नेटवर्क
राजधानी दिल्लीतील माया विहार परिसरातील लवली हेरिटेज स्कूलमध्ये गुरुवारी सकाळी धक्कादायक घटना घडली. तिसरी इयत्तेत शिकणाऱ्या अवघ्या नऊ वर्षांच्या प्रगती नावाच्या विद्यार्थिनीचा शाळेत असतानाच अचानक मृत्यू झाला. वर्गात चालत असताना ती अचानक खाली झुकली आणि जमिनीवर कोसळली. या घटनेने शाळा प्रशासन, शिक्षक आणि विद्यार्थ्यांमध्ये खळबळ उडाली आहे.
प्रगती सकाळी शाळेत नियमितपणे आली होती. वर्गात इतर मुलांबरोबर असताना ती चालत होती. अचानक तिचे शरीर हळूहळू खाली झुकू लागले आणि काही क्षणांतच ती जमिनीवर कोसळली. शिक्षिका तिला उचलण्यासाठी धावल्या. विद्यार्थिनीला तातडीने निर्मान विहार येथील मलिक रेडिक्स हेल्थ केअर रुग्णालयात नेण्यात आले. मात्र डॉक्टरांनी तपासणीनंतर तिला मृत घोषित केले.
या अचानक मृत्यूमुळे शाळेतील वातावरण शोकमय झाले आहे. परिसरातील पालक आणि रहिवाशांमध्येही हळहळ व्यक्त केली जात आहे. नऊ वर्षांच्या चिमुरडीचा असा अकाली अंत झाल्याने सर्वांना धक्का बसला आहे. मृत्यूचे नेमके कारण अद्याप स्पष्ट झालेले नाही. डॉक्टरांनीही तत्काळ काही स्पष्ट कारण सांगितले नाही.
या घटनेचे सर्वात महत्त्वाचे पुरावे म्हणजे वर्गातील सीसीटीव्ही फुटेज. या फुटेजमध्ये प्रगती अचानक हळूहळू खाली झुकताना आणि नंतर जमिनीवर कोसळताना स्पष्टपणे दिसते. सोशल मीडियावर हे फुटेज व्हायरल झाले असून अनेकांनी चिंता व्यक्त केली आहे. शाळेतील इतर विद्यार्थी आणि शिक्षकही या दृश्यामुळे अस्वस्थ झाले आहेत.
दिल्ली पोलिसांना सकाळी सुमारे ९:५२ वाजता या घटनेची माहिती मिळाली. पोलिसांनी तातडीने चौकशी सुरू केली आहे. सीसीटीव्ही फुटेजची तपासणी करण्यात आली आहे. विद्यार्थिनीच्या पालकांचे आणि शाळेतील संबंधित अधिकाऱ्यांचे जबाब नोंदवले जाणार आहेत. मृत्यूमागील नेमके कारण शोधण्यासाठी सविस्तर तपास सुरू आहे.
