सर्व विषयात 35 गुण, दहावीच्या दोन विद्यार्थ्यांनी साधले पासिंगचे अचूक गणित

एज्युवार्ता न्यूज नेटवर्क

दहावीचा निकाल (10 th Class Result) लागला की चर्चा होते ती 90 टक्क्यांच्या पुढे गुण मिळवणाऱ्यांची. चुरस असते ती गुणवत्ता यादीत स्थान मिळवणाऱ्यांची. आणि गाजावाजा होतो तो 100 पैकी 100 गुण घेणाऱ्यांचा. पण नांदेड जिल्ह्याने (Nanded District Education) यंदा एक असा निकाल पाहिला आहे. ज्याची चर्चा गुणवत्तेच्या यादीपेक्षाही जास्त होत आहे. नांदेडच्या दोन विद्यार्थ्यांनी दहावीच्या परीक्षेत एक असा अजब (A Bizarre Verdict) योगायोग साधला आहे, जो पाहून भल्याभल्या तज्ज्ञांनाही आश्चर्य वाटेल. दोघांनीही बरोबर ३५ पासिंग गणित (Passing Mathematics) साधले आहे. 

कंधार तालुक्यातील नंदनवन येथील श्रुती भागानगरे आणि उमरीच्या नूतन विद्यालयाचा श्रीराज धुतुरे या दोघांनी दहावीच्या परीक्षेत सर्व विषयांत नेमके 35-35गुण मिळवून यश संपादन केले आहे. गणिताच्या भाषेत सांगायचे तर हे विद्यार्थी काठावर पास झाले आहेत, पण त्यांच्या संघर्षाची कहाणी मात्र 100नंबरी आहे.

कंधार तालुक्यातील नंदनवन ही एक छोटीशी वस्ती. इथल्या मातीत राबणाऱ्या बापाची लेक श्रुती हिने दाखवून दिले की, जिद्द असेल तर परिस्थितीवर मात करता येते. श्रुतीसाठी दहावीची परीक्षा ही केवळ पुस्तकी परीक्षा नव्हती. तिला सकाळी उठल्यापासून आईला घरकामात मदत करावी लागायची. इतकेच नाही तर वडिलांना शेतीच्या कामात हातभार लावण्यासाठी तिला भर उन्हात शेतात जावे लागायचे. शाळा, घरकाम आणि शेती असा प्रवास करत श्रुतीने अभ्यास केला. 

तिला परीक्षेत सर्व सहा विषयांत प्रत्येकी 35 गुण मिळाले आहेत. जेव्हा तिचा निकाल समोर आला, तेव्हा गावात एकच चर्चा सुरू झाली. अनेकांना वाटले की हे कसे शक्य आहे? पण श्रुतीसाठी हे 35 गुण म्हणजे तिने रक्ताचे पाणी करून मिळवलेली कमाई आहे. मला किती टक्के मिळाले यापेक्षा मी पास झाले आणि माझ्या वडिलांच्या डोळ्यात समाधान दिसले, हे माझ्यासाठी महत्त्वाचे आहे, अशा भावना श्रुतीने यावेळी व्यक्त केल्यात.

दुसरीकडे उमरी येथील नूतन विद्यालयाचा श्रीराज धुतुरे यानेही असाच पराक्रम केला आहे. श्रीराजच्या निकालातही सर्व विषयांसमोर 35 हा आकडा झळकत आहे. श्रीराजनेही अत्यंत प्रतिकूल परिस्थितीत आपले शिक्षण पूर्ण केले. कुटुंबाची आर्थिक ओढाताण आणि संसाधनांची कमतरता असतानाही श्रीराजने हार मानली नाही. त्याने परीक्षेची तयारी केली आणि नेमके पासिंग मार्क मिळवून सर्वांचे लक्ष वेधून घेतले.

निकाल जाहीर झाल्यानंतर सोशल मीडियावर या दोघांचे मार्कशीट व्हायरल होत आहेत. नेटकरी याला नशिबाचा आणि गणिताचा अजब मेळ म्हणत आहेत. 100 टक्के घेणारे अनेक पाहिले, पण नेमके 35 घेणारे दुर्मिळ. ही मुलं भविष्यातील मॅनेजमेंट गुरु आहेत, त्यांना माहिती आहे की किती कष्ट घेतल्यावर किती फळ मिळते. पास होण्यासाठी लागणारी अचूक ऊर्जा या विद्यार्थ्यांनी वापरली आहे, अशा मजेशीर आणि कौतुकाच्या प्रतिक्रिया उमटत आहेत.