SPPU विद्यापीठ 'या' कॉलेजचे प्रवेश रोखणार;18 मे पर्यंत मुदत 

एज्युवार्ता न्यूज नेटवर्क 

विद्यापीठ कायद्यातील तरतुदीनुसार तसेच एआयसीटीई, यूजीसी आणि महाराष्ट्र शासनाने वेळोवेळी प्रसिद्ध केलेल्या परिपत्रकानुसार महाविद्यालयांमध्ये 50 टक्के शिक्षक वर्ग असणे आवश्यक आहे. सावित्रीबाई फुले पुणे विद्यापीठाशी संलग्न असणाऱ्या महाविद्यालयांमध्ये पन्नास टक्के शिक्षक वर्ग असल्यासंदर्भातील माहिती ऑनलाईन अपलोड करून देण्याबाबत विद्यापीठ प्रशासनाने वेळोवेळी मुदत दिली होती. मुदतीमध्ये शिक्षकांची माहिती अपलोड करून न देणाऱ्या महाविद्यालयांची 2026-27 या शैक्षणिक वर्षाचे प्रथम वर्षाचे प्रवेश थांबवले जाणार आहेत. अनेक महाविद्यालयांनी अद्याप विद्यापीठाकडे यासंदर्भातील माहिती जमा केलेली नाही.त्यामुळे विद्यापीठाने अंतिम मुदत म्हणून येत्या 18 मे पर्यंत माहिती जमा करण्यासंदर्भात सूचना दिल्या आहेत. त्यानंतर संबंधित महाविद्यालयाचे प्रथम वर्षाचे प्रवेश रोखले जाणार आहेत.

विद्यापीठाने प्रसिद्ध केलेल्या परिपत्रकानुसार महाराष्ट्र सार्वजनिक विद्यापीठ कायद्यातील तरतुदीनुसार संलग्नित महाविद्यालये/मान्यताप्राप्त परिसंस्था यांमधील अध्यापक व अध्यापकेतर कर्मचा-यांची संख्या, अर्हता, सेवेच्या अटी व शर्ती तसेच वित्तलब्धी या, विद्यापीठाने व राज्य शासनाने प्रसिद्ध केल्याप्रमाणे असणे आणि त्या अभ्यास पाठयक्रम, अध्यापन, प्रशिक्षण आणि संशोधन यांच्याकरिता कार्यक्षमतेने योग्य ती तरतूद करण्यास पुरेशा असणे ही संलग्नीकरण तसेच मान्यता यांकरिताची अट आहे.त्याचे अनुपालन करणे संलग्नित महाविद्यालये/ मान्यताप्राप्त परिसंस्था यांवर बंधनकारक आहे.

अखिल भारतीय तंत्रशिक्षण परिषद, विद्यापीठ अनुदान आयोग तसेच शासनाने विहीत केलेल्या किमान मानंकानुसार ज्या संलग्नित महाविद्यालये/ मान्यताप्राप्त परिसंस्थामध्ये ३१ मार्च २०२६ पर्यत नियमित आणि तदर्थ स्वरूपात नियुक्त झालेल्या आणि विद्यापीठाची मान्यता असलेल्या शिक्षकांची किमान संख्या एकत्रितपणे ५० टक्क्यांपेक्षा कमी असेल अशा संलग्नित महाविद्यालय/मान्यताप्राप्त परिसंस्थेतील अभ्यासक्रमांच्या प्रथम वर्षाचे विद्यार्थी प्रवेश शैक्षणिक वर्ष २०२६-२७ मध्ये थांबविण्यात यावेत, असा निर्णय विद्यापीठाच्या विद्यापरिषदेने २४ जानेवारी २०२६ घेतला आहे.

शिक्षक नियुक्तीची प्रक्रिया पूर्ण करण्यासाठी ३१ मार्च २०२६ पर्यंत मुदत देण्यात आली होती.त्यानंतर प्रक्रिया पूर्ण करण्याकरीता दिनांक १५ एप्रिल २०२६ पर्यंत अंतिम मुदतवाढ देण्यात आली होती. त्यानंतरही ९ मे २०२६ पर्यंत मुदतवाढ देण्यात आली होती. परंतु,असे निदर्शनास आले आहे की अद्याप ब-याच महाविद्यालयांची / मान्यताप्राप्त परिसंस्थांची माहिती BOD पोर्टलवर ऑनलाईन स्वरूपात upload करावयाची बाकी आहे. 

सर्व महाविद्यालयांना कळविण्यात येते की आपल्या महाविद्यालयातील किंवा परिसंस्थेतील नियमित आणि तदर्थ स्वरूपात नियुक्त झालेले आणि विद्यापीठाची मान्यता असलेल्या शिक्षकांची किमान संख्या एकत्रितपणे ५० टक्के असल्याबाबतची संबंधित कागदपत्रे व माहिती BOD पोर्टलवर ऑनलाईन स्वरूपात upload करण्याकरिता १८ मे, २०२६ पर्यंत अंतिम मुदतवाढ देण्यात येत आहे. ही मुदतवाढ अंतीम मुदतवाढ असुन त्यानंतर कोणत्याही परिस्थितीत माहिती BOD पोर्टलवर ऑनलाईन स्वरूपात upload करण्याकरीता मुदतवाढ देण्यात येणार नाही. याची सर्व संबंधितांनी गांभीर्याने नोंद घेऊन आवश्यक ती कार्यवाही त्वरीत पूर्ण करावी.

माहिती अपलोड करण्याची प्रक्रिया १८ मे २०२६ पर्यंत पूर्ण न केल्यास याबाबत आपणास काहीही म्हणावयाचे नाही, असे समजून आपल्या महाविद्यालयातील / परिसंस्थेमधील संबंधित अभ्यासक्रमांसाठी शैक्षणिक वर्ष २०२६-२७ मधील प्रथम वर्षाचे प्रवेश थांबविण्याचा निर्णय घेण्यात येईल, याची नोंद घ्यावी, असे पत्रक विद्यापीठाने प्रसिद्ध केले आहे.