वैद्यकीय अभ्यासक्रम: MBBS च्या ४०० हून अधिक जागा रिक्त; शुल्कातील वाढीमुळे विद्यार्थ्यांनी फिरवली पाठ
वैद्यकीय शिक्षणाच्या वाढत्या खर्चामुळे देशभरातील खासगी वैद्यकीय महाविद्यालयांमधील एमबीबीएसच्या अनेक जागा रिक्त राहिल्या आहेत. वैद्यकीय समुपदेशन समितीने विशेष स्ट्रे व्हेकेन्सी राऊंड आयोजित केल्यानंतरही एकूण ४११ जागांचे वाटप होऊ शकले नाही.
Eduvarta
एज्युवार्ता न्यूज नेटवर्क
वैद्यकीय शिक्षणाच्या वाढत्या खर्चामुळे देशभरातील खासगी वैद्यकीय महाविद्यालयांमधील एमबीबीएसच्या अनेक जागा रिक्त राहिल्या आहेत. वैद्यकीय समुपदेशन समितीने विशेष स्ट्रे व्हेकेन्सी राऊंड आयोजित केल्यानंतरही एकूण ४११ जागांचे वाटप होऊ शकले नाही. या विशेष फेरीत ९४८ रिक्त जागा उपलब्ध होत्या, परंतु त्यापैकी केवळ ५३७ जागांना विद्यार्थ्यांनी प्रतिसाद दिला. उर्वरित जागा रिक्त राहिल्या असल्याचे टाइम्स ऑफ इंडियाच्या वृत्तात स्पष्ट झाले आहे.
गेल्या वर्षी एमबीबीएसच्या केवळ ६० ते ७० जागा रिक्त राहिल्या होत्या. यंदा मात्र विशेष समुपदेशन फेरी संपल्यानंतरही ४०० हून अधिक जागा रिक्त आहेत. सर्वोच्च न्यायालयाने चार फेऱ्या घेण्याचे निर्देश दिले होते, तरीही विद्यार्थ्यांना अधिक संधी मिळावी म्हणून पाचवी फेरीही घेण्यात आली. तरीही जागा भरता आल्या नाहीत, अशी माहिती केंद्रीय आरोग्य मंत्रालयाच्या एका अधिकाऱ्याने दिली आहे.
खासगी महाविद्यालयांमधील शुल्कात झालेली मोठी वाढ हे मुख्य कारण मानले जात आहे. काही संस्थांमध्ये पूर्वी सुमारे १५ लाख रुपये असलेले वार्षिक शुल्क आता २५ ते ३० लाख रुपयांपर्यंत वाढवण्यात आले आहे. नीट परीक्षेत पात्र ठरलेल्या अनेक विद्यार्थ्यांनाही इतके शुल्क परवडणे शक्य होत नसल्याने त्यांनी या जागांना पसंती दिली नाही. समुपदेशनाच्या आकडेवारीतून प्रत्येक विद्यार्थ्याच्या नकाराचे नेमके कारण स्पष्ट होत नसले, तरी आर्थिक भार हा महत्त्वाचा घटक असल्याचे दिसून येते.
सरकारी वैद्यकीय महाविद्यालये आणि काही प्रतिष्ठित खासगी संस्थांमधील जागा सहज भरल्या जात आहेत. मात्र काही खासगी महाविद्यालयांमध्ये मोठ्या प्रमाणात जागा रिक्त राहत आहेत. त्यामुळे अशा संस्थांनी शुल्करचना, शिक्षणाची गुणवत्ता आणि पायाभूत सुविधा यांचा आढावा घेणे आवश्यक असल्याचे आरोग्य मंत्रालयाच्या अधिकाऱ्याने सांगितले.
केवळ जागा वाढवणे पुरेसे नाही. वैद्यकीय शिक्षण विद्यार्थ्यांना परवडणारे असणेही तितकेच महत्त्वाचे आहे. खासगी महाविद्यालयांचे शुल्क अशाच पद्धतीने वाढत राहिले तर जागांची संख्या वाढवूनही त्याचा फारसा उपयोग होणार नाही. आर्थिक अडचणींमुळे अनेक पात्र विद्यार्थ्यांना प्रवेश घेता येणार नाही, असेही या अधिकाऱ्याने स्पष्ट केले आहे.
