वैद्यकीय अभ्यासक्रमात १ हजार ६६ जागांची वाढ ; महाराष्ट्र देशात दुसर्‍या स्थानावर
महाराष्ट्राने वैद्यकीय शिक्षण क्षेत्रात महत्त्वपूर्ण यश संपादन करत पदव्युत्तर ब्रॉड-स्पेशालिटी अभ्यासक्रमांच्या प्रवेश क्षमतेत १ हजार ६६ जागांची वाढ केली आहे. यामुळे २०२६-२७ शैक्षणिक वर्षात राज्यातील एकूण जागांची संख्या ७ हजार ६१५ वर पोहोचली आहे.
Eduvarta
एज्युवार्ता न्यूज नेटवर्क
महाराष्ट्राने वैद्यकीय शिक्षण क्षेत्रात महत्त्वपूर्ण यश संपादन करत पदव्युत्तर ब्रॉड-स्पेशालिटी अभ्यासक्रमांच्या प्रवेश क्षमतेत १ हजार ६६ जागांची वाढ केली आहे. यामुळे २०२६-२७ शैक्षणिक वर्षात राज्यातील एकूण जागांची संख्या ७ हजार ६१५ वर पोहोचली आहे. राष्ट्रीय वैद्यकीय आयोगाच्या अद्ययावत आकडेवारीनुसार ही वाढ मागील वर्षाच्या तुलनेत सुमारे १६.३ टक्के आहे. देशभरात कर्नाटक ८ हजार ८६२ जागांसह पहिल्या क्रमांकावर असताना महाराष्ट्राने दुसरे स्थान मिळवले आहे. वैद्यकीय शिक्षण मंत्री हसन मुश्रीफ यांनी याबाबत समाधान व्यक्त करत विभागाने केलेले नियोजनबद्ध प्रयत्न, पायाभूत सुविधा विकास आणि पदव्युत्तर संधी वाढविण्यासाठी राबविलेल्या उपाययोजनांमुळे ही प्रगती साध्य झाल्याचे सांगितले.
राज्यातील २३ शासकीय वैद्यकीय महाविद्यालयांमध्ये एम.डी. आणि एम.एस. अभ्यासक्रमांसाठी एकूण ७२० अतिरिक्त जागा मंजूर झाल्या आहेत. यामध्ये शासकीय वैद्यकीय महाविद्यालय धाराशिव येथे सर्वाधिक ७७ जागांची वाढ झाली आहे. छत्रपती संभाजीनगर येथे ७३, सातारा येथे ६४, धुळे येथे ४४ आणि अंबरनाथ येथे ४० जागा वाढल्या आहेत. कोल्हापूरातील राजर्षी छत्रपती शाहू महाराज शासकीय वैद्यकीय महाविद्यालयातही ३९ नवीन एम.डी. जागा मंजूर झाल्या आहेत.
कोल्हापूर महाविद्यालयातील या ३९ जागांची विभागनिहाय वाढ अशी आहे: भूलशास्त्रात १०, प्रतिबंधात्मक व सामाजिक वैद्यकशास्त्रात ४, त्वचारोग व गुप्तरोगात ४, शरीरक्रियाशास्त्रात ४, रेडिओलॉजीत ४, मनोविकारशास्त्रात ३, जनरल सर्जरीत ५, प्रसूती व स्त्रीरोगशास्त्रात ३, छाती व क्षयरोगात १ आणि नेत्ररोगशास्त्रात १ जागा. यामुळे संबंधित विभागांमध्ये पदव्युत्तर विद्यार्थ्यांना अधिक चांगले शैक्षणिक मार्गदर्शन, संशोधन आणि प्रत्यक्ष रुग्णसेवेचा अनुभव मिळणार आहे.
या वाढीव जागांमुळे भूलशास्त्र, शस्त्रक्रिया, स्त्रीरोग, रेडिओलॉजी आणि मनोविकारशास्त्र यांसारख्या महत्त्वाच्या शाखांमध्ये विशेषज्ञ डॉक्टरांची निर्मिती वेगाने होईल. विशेषतः कोल्हापूर आणि पश्चिम महाराष्ट्रात तज्ज्ञ डॉक्टरांची उपलब्धता वाढण्यास मदत होईल. राज्यातील वैद्यकीय शिक्षणाच्या संधी विस्तारित झाल्याने भविष्यात अधिक सक्षम आणि कुशल डॉक्टर तयार होण्यास चालना मिळेल.
ही जागावाढ महाराष्ट्राच्या वैद्यकीय शिक्षण व्यवस्थेसाठी एक मोठे पाऊल आहे. विद्यार्थ्यांना अधिक संधी उपलब्ध होऊन राज्यातील आरोग्य सेवा प्रणाली आणखी सक्षम होईल, अशी अपेक्षा व्यक्त केली जात आहे.
