‘वंदे मातरम्’च्या सामूहिक गायनाने SPPU विद्यापीठ दुमदुमले;‘यूथ की आवाज’ उपक्रमाला तरुणाईचा अभूतपूर्व प्रतिसाद
विद्यापीठातील डॉ. बाबासाहेब आंबेडकर यांच्या पुतळ्याजवळ झालेल्या या कार्यक्रमात ‘भारत माता की जय’ आणि ‘वंदे मातरम् के सन्मान में, देश का युवा मैदान में’ अशा घोषणांनी संपूर्ण परिसर दुमदुमून गेला.
Eduvarta
0
एज्युवार्ता न्यूज नेटवर्क
देशभक्तीपर गीतांचे ओघवत्ये सूर, हजारो मोबाईलच्या फ्लॅशलाईट्सचा लखलखाट आणि हजारो युवकांच्या एकसुरातील ‘वंदे मातरम्’चा निनाद... अशा अत्यंत भारावलेल्या व उत्साहपूर्ण वातावरणात सावित्रीबाई फुले पुणे विद्यापीठाचा परिसर शनिवारी देशभक्तीच्या रंगात न्हाऊन निघाला. ‘वंदे मातरम् कृती समिती, पुणे’तर्फे आयोजित ‘यूथ की आवाज’ या विशेष संगीतमय कार्यक्रमाला पुणेकर तरुणाईचा उत्स्फूर्त प्रतिसाद मिळाला.
विद्यापीठातील डॉ. बाबासाहेब आंबेडकर यांच्या पुतळ्याजवळ झालेल्या या कार्यक्रमात ‘भारत माता की जय’ आणि ‘वंदे मातरम् के सन्मान में, देश का युवा मैदान में’ अशा घोषणांनी संपूर्ण परिसर दुमदुमून गेला. ‘सुनो गौर से दुनियावालों’, ‘जय हो’, ‘जय जय महाराष्ट्र माझा’ आणि ‘वेडात मराठे वीर दौडले सात’ यांसारख्या देशभक्तीपर आणि महाराष्ट्राच्या अस्मितेला साद घालणाऱ्या गीतांनी उपस्थितांना मंत्रमुग्ध केले.
या वेळी बंकिमचंद्र चट्टोपाध्याय यांच्या ‘आनंदमठ’ कादंबरीतील ‘वंदे मातरम्’ या गीताला १५० वर्षे पूर्ण होत असल्याच्या पार्श्वभूमीवर, स्वातंत्र्यलढ्यातील या गीताच्या ऐतिहासिक योगदानाचे स्मरण करण्यात आले. १८९६ मध्ये गुरुदेव रवींद्रनाथ टागोर यांनी काँग्रेस अधिवेशनात हे गीत गायल्यानंतर ते देशाच्या स्वातंत्र्यसंग्रामाचे मुख्य प्रेरणागीत कसे बनले, यावर प्रकाश टाकण्यात आला.
मोबाईलच्या फ्लॅशलाईट्सची अनोखी प्रकाशज्योत
कार्यक्रमाच्या उत्तरार्धात मैदानातील मुख्य दिवे मंद करण्यात आले. हजारो तरुणांनी एकाच वेळी मोबाईलचे फ्लॅशलाईट्स सुरू करत, हातात प्रकाशज्योत आणि ओठांवर ‘वंदे मातरम्’ घेऊन सामूहिक गायन केले. या वेळी जणू मैदानावर नक्षत्रांचे आभाळच उतरल्याचा भास होत होता. विकसित भारताच्या उभारणीत सक्रिय योगदान देण्याचा संकल्प करत या स्वरसंध्येची सांगता झाली.
-------------------------
"पुण्यातील देशभक्त युवा आज संपूर्ण ‘वंदे मातरम्’ गात आहेत, याबद्दल मी त्यांचे मनःपूर्वक अभिनंदन करतो. आपण संविधानाने दिलेल्या अधिकाराचा वापर करून हे गीत म्हणतो. मात्र, भूतकाळात काँग्रेसने संपूर्ण वंदे मातरम् गाण्याला विरोध केला होता. यासाठी त्यांनी देश, क्रांतिकारक आणि संविधानाची माफी मागितली पाहिजे. राष्ट्रभक्त युवक संपूर्ण वंदे मातरम् म्हटल्याशिवाय राहणार नाहीत आणि हाच देशाच्या युवाशक्तीचा खरा संदेश आहे."
— मुरलीधर मोहोळ, केंद्रीय नागरी विमान वाहतूक व सहकार राज्यमंत्री
