प्राध्यापकांचा १६ नोव्हेंबरला धडक मोर्चा;तुमची दिवाळी,आमचं दिवाळं..
‘दे धडक बेधडक… तुमची दिवाळी, आमचं दिवाळं… चलो पुणे, चलो पुणे!’ या घोषणेद्वारे राज्यभरातील नेट, सेट व पीएच.डी. धारक प्राध्यापकांना आंदोलनात मोठ्या संख्येने सहभागी होण्याचे आवाहन करण्यात आले आहे. आंदोलनाचे ठिकाण संचालक, उच्च शिक्षण कार्यालय, बहिरट पाटील चौक, मॉडेल कॉलनी असून सोमवारी १६ नोव्हेंबर २०२६ रोजी सकाळी १० वाजता मोर्चा काढला जाणार आहे.
Eduvarta
एज्युवार्ता न्यूज नेटवर्क
राज्यातील नेट, सेट आणि पीएच.डी. धारक प्राध्यापकांच्या प्रलंबित मागण्यांकडे शासनाचे लक्ष वेधण्यासाठी नेट-सेट, पीएच.डी. धारक संघर्ष समितीच्या वतीने येत्या सोमवारी १६ नोव्हेंबर २०२६ रोजी पुण्यात धडक मोर्चाचे आयोजन करण्यात आले आहे. समान कामाला समान वेतन, प्राध्यापक भरती प्रक्रियेत पारदर्शकता आणि राष्ट्रीय शैक्षणिक धोरण (NEP) २०२० नुसार अध्यापन कार्यभार निश्चित करणे, या प्रमुख मागण्यांसाठी हे आंदोलन करण्यात येणार आहे.
उच्च शैक्षणिक पात्रता प्राप्त करूनही राज्यातील अनेक पात्र प्राध्यापकांना तासिका तत्त्वावर (CHB) अत्यंत तुटपुंज्या मानधनावर काम करावे लागत आहे. अध्यापनाचा अनुभव, संशोधनातील योगदान आणि शैक्षणिक जबाबदाऱ्या पार पाडूनही या प्राध्यापकांना आर्थिक अस्थिरता व सेवाविषयक अनिश्चिततेचा सामना करावा लागत आहे. त्यामुळे प्राध्यापकांच्या श्रमांना योग्य मोबदला, सन्मानजनक वेतन आणि सेवासुरक्षा मिळावी, या मागण्यांसाठी संघर्ष समितीने आंदोलनाची हाक दिली आहे.
संघर्ष समितीने समान कामाला समान वेतन हे तत्त्व लागू करण्याची मागणी केली आहे. विद्यापीठ अनुदान आयोगाच्या निर्देशांनुसार CHB नियुक्ती पद्धती बंद करून प्राध्यापकांची एकत्रित वेतनावर कंत्राटी पद्धतीने नियुक्ती करावी, अशी समितीची भूमिका आहे. तसेच राज्यातील प्राध्यापक भरती प्रक्रिया भ्रष्टाचार, गैरप्रकार आणि पक्षपातापासून मुक्त ठेवून पारदर्शक व गुणवत्ताधारित पद्धतीने गतिमान करावी आणि प्रलंबित भरती तातडीने पूर्ण करावी, अशीही मागणी करण्यात आली आहे.
राष्ट्रीय शैक्षणिक धोरण २०२० च्या अनुषंगाने प्राध्यापकांच्या अध्यापन व शैक्षणिक कार्यभाराच्या मोजणीबाबत स्पष्ट, सुसंगत आणि न्याय्य शासन निर्णय निर्गमित करावा, अशी मागणीही संघर्ष समितीने केली आहे. या प्रश्नांवर शासन आणि उच्च शिक्षण विभागाने गांभीर्याने विचार करून पात्रताधारक प्राध्यापकांना न्याय द्यावा, असे समितीचे म्हणणे आहे.
‘दे धडक बेधडक… तुमची दिवाळी, आमचं दिवाळं… चलो पुणे, चलो पुणे!’ या घोषणेद्वारे राज्यभरातील नेट, सेट व पीएच.डी. धारक प्राध्यापकांना आंदोलनात मोठ्या संख्येने सहभागी होण्याचे आवाहन करण्यात आले आहे. आंदोलनाचे ठिकाण संचालक, उच्च शिक्षण कार्यालय, बहिरट पाटील चौक, मॉडेल कॉलनी असून सोमवारी १६ नोव्हेंबर २०२६ रोजी सकाळी १० वाजता मोर्चा काढला जाणार आहे.
राज्यातील सर्व नेट, सेट व पीएच.डी. धारक प्राध्यापक, संशोधक आणि शिक्षण क्षेत्रातील न्यायप्रिय घटकांनी आपल्या हक्कांच्या लढ्याला बळ देण्यासाठी मोठ्या संख्येने उपस्थित राहावे, असे आवाहन नेट-सेट, पीएच.डी. धारक संघर्ष समिती, महाराष्ट्र राज्याचे राज्य समन्वयक डॉ. प्रमोद तांबे यांनी केले आहे.
