शिक्षक दाम्पत्याने गळफास घेत आयुष्य संपवलं; दोन महिन्यांपूर्वीच झालं होतं लग्न
नागपूरच्या बेसा परिसरातील रेवतीनगर येथे एका शिक्षक दाम्पत्याने दिवाळीच्या सुट्टीत गळफास घेऊन जीवन संपवल्याची धक्कादायक घटना उघडकीस आली आहे. अवघ्या दोन महिन्यांपूर्वी लग्न करून नव्या संसाराला सुरुवात केलेल्या या जोडप्याच्या मृत्यूने परिसरात हळहळ व्यक्त होत आहे.
Eduvarta
एज्युवार्ता न्यूज नेटवर्क
नागपूरच्या बेसा परिसरातील रेवतीनगर येथे एका शिक्षक दाम्पत्याने दिवाळीच्या सुट्टीत गळफास घेऊन जीवन संपवल्याची धक्कादायक घटना उघडकीस आली आहे. अवघ्या दोन महिन्यांपूर्वी लग्न करून नव्या संसाराला सुरुवात केलेल्या या जोडप्याच्या मृत्यूने परिसरात हळहळ व्यक्त होत आहे. मृतांची नावे सोनाली (वय ३५) आणि मनीष प्रल्हाद गणवीर (वय ३८) अशी आहेत. दोघेही गडचिरोली येथील लॉयड्स स्कूलमध्ये शिक्षक म्हणून कार्यरत होते. त्यांच्या मृत्यूचे नेमके कारण अद्याप स्पष्ट झालेले नाही.
सोनाली आणि मनीष यांची ओळख गडचिरोली येथे नोकरीदरम्यान झाली होती. दोघांचेही यापूर्वी विवाह झाले होते, पण वैवाहिक आयुष्यात मतभेद निर्माण झाल्याने घटस्फोट झाला होता. त्यानंतर दोघे एकमेकांच्या प्रेमात पडले आणि एकत्र आयुष्य जगण्याचा निर्णय घेतला. अखेर ३१ ऑगस्ट रोजी त्यांनी कोर्टात लग्न केले. लग्नानंतर ते गडचिरोली येथे एकत्र राहत होते.
दिवाळी साजरी करण्यासाठी दोघेही नागपुरातील मनीषच्या घरी आले होते. मनीषचे कुटुंबीय देवदर्शनासाठी बुद्धगया येथे गेले असल्याने घरात फक्त हे दोघेच होते. घटनेपूर्वी त्यांच्यात भांडण झाल्याचा संशय व्यक्त केला जात आहे. मनीषचे नातेवाईक भेटायला आले असता घराचा दरवाजा आतून बंद होता. फोनवरही प्रतिसाद न मिळाल्याने संशय आला. त्यांनी दुसऱ्या मजल्यावरील गॅलरीतून खिडकीतून पाहिले, तेव्हा दोघे गळफास घेतलेल्या अवस्थेत दिसले.
बेलतरोडी पोलिसांना माहिती दिल्यानंतर वरिष्ठ पोलीस निरीक्षक नाईकवडे पथकासह घटनास्थळी पोहोचले. शेजारी आणि नातेवाईकांच्या उपस्थितीत दरवाजा तोडण्यात आला. हॉलमध्ये दारूची बाटली आणि दोन ग्लास आढळले. बेडरूममध्ये मनीष आणि सोनाली यांचे मृतदेह वेगवेगळ्या ओढणीच्या साहाय्याने सिलिंग फॅनला गळफास घेतलेल्या अवस्थेत होते. पोलिसांनी पंचनामा करून मृतदेह उत्तरीय तपासणीसाठी मेडिकल रुग्णालयात पाठवले.
नातेवाईक प्रशिक लांडगे यांच्या माहितीवरून बेलतरोडी पोलिसांनी आकस्मिक मृत्यूची नोंद केली आहे. या दुःखद घटनेने दोघांच्या कुटुंबीयांमध्ये शोककळा पसरली आहे. पोलिस पुढील चौकशी करत आहेत.
