शाळेतील विद्यार्थ्याचा शिक्षकावर चाकू हल्ला; मुख्याध्यापिकेच्या केबिनमध्ये घडली थरारक घटना

एज्युवार्ता न्यूज नेटवर्क 

छत्रपती संभाजीनगर (Chhatrapati Sambhajinagar Crime) येथील छावणी परिसरातील एका शाळेत गुरु-शिष्याच्या पवित्र नात्याला काळिमा फासणारी धक्कादायक घटना घडली आहे. अल्पवयीन ९ वीच्या विद्यार्थ्याने (9th-grade student) मुख्याध्यापिकांच्या केबिनमध्ये आपल्या वर्ग शिक्षकावर धारदार चाकूने जीवघेणा हल्ला (Knife attack on class teacher) केला. या हल्ल्यात शिक्षक गंभीर जखमी (Teacher seriously injured) झाले असून त्यांच्यावर शासकीय घाटी रुग्णालयाच्या अतिदक्षता विभागात उपचार सुरू आहेत. ही घटना नांगरिकांमध्ये भीतीचे वातावरण निर्माण करणारी ठरली आहे.

मिळालेल्या माहितीनुसार, मुख्याध्यापिका आपल्या केबिनमध्ये नियमित काम करत असताना हा विद्यार्थी अचानक आला आणि शाळा सोडण्याच्या दाखल्याची मागणी केली. मुख्याध्यापिकेने त्याला रीतसर अर्ज दाखल करून फी भरण्याचे सांगितले. विद्यार्थ्याने अर्ज देण्यास स्पष्ट नकार दिला. वाद वाढत असल्याने मुख्याध्यापिकेने संबंधित वर्गशिक्षकांना केबिनमध्ये बोलावून घेतले. शिक्षक केबिनमध्ये आल्यावर विद्यार्थी प्रचंड उत्तेजित झाला आणि आरडाओरडा सुरू केली. त्याने शिक्षकांवर “मला मुद्दाम नापास केले” असा आरोप ठेवला. 

विशेष म्हणजे, हल्ला करणारा विद्यार्थी विज्ञान आणि गणित या विषयांमध्ये नापास झाल्याचा दावा करत होता. परंतु वर्गशिक्षक फक्त मराठी आणि हिंदी विषय शिकवतात. त्यांचा निकाल प्रक्रियेशी कसलाही संबंध नव्हता. तरीही विद्यार्थ्याने रागाच्या भरात “मी तुला जिवंत सोडणार नाही, तुझा गेम करतो,” अशा शब्दात धमकी दिली. मुख्याध्यापिकेने शांततेने समजावण्याचा पूर्ण प्रयत्न केला, मात्र डोक्यात भूत शिरलेल्या विद्यार्थ्याने कमरेला लपवलेला चाकू बाहेर काढला आणि शिक्षकांवर वार केला. 

या अनपेक्षित हल्ल्याने केबिनमध्ये एकच हलकल्लोळ उडाला. मुख्याध्यापिका आणि इतर कर्मचारी तातडीने शिक्षकांना मदत करून रुग्णालयात दाखल करण्यात यशस्वी झाले. सध्या शिक्षकांची प्रकृती गंभीर असल्याचे सांगण्यात येत आहे. पोलिसांनी विद्यार्थ्याला ताब्यात घेतले असून त्याच्यावर कायद्यानुसार कारवाई सुरू केली आहे. 

पोलीस तपासात विद्यार्थ्याने चाकू ऑनलाइन मागवल्याची खळबळजनक माहिती उघड झाली आहे. शाळेतील सुरक्षा व्यवस्था आणि विद्यार्थ्यांच्या मानसिक आरोग्याकडे दुर्लक्ष होत असल्याचे चित्र निर्माण झाले आहे. या घटनेने शिक्षण क्षेत्रात सुरक्षेच्या मुद्द्यावर पुन्हा एकदा चर्चा सुरू केली आहे. पालक आणि शिक्षक संघटनांनी घटनेचा निषेध केली असून शाळांमध्ये कडक सुरक्षा व्यवस्था आणि विद्यार्थ्यांसाठी मानसिक समुपदेशन सुविधा उपलब्ध कराव्या, अशी मागणी केली आहे.