CHB प्राध्यापक संघटनेचे आंदोलन मंत्री चंद्रकांत पाटील यांच्या आश्वासनानंतर स्थगित

एज्युवार्ता न्यूज नेटवर्क 

 राष्ट्रीय शैक्षणिक धोरण (NEP-2020) अंतर्गत महाविद्यालयीन शिक्षकांचा कार्यभार सर्व Verticals नुसार मोजण्यात यावा, शैक्षणिक वर्ष २०२५-२६ मध्ये मंजूर करण्यात आलेल्या सीएचबी (CHB) पदांच्या एनओसीला शैक्षणिक वर्ष २०२६-२७ मध्येही मुदतवाढ देण्यात यावी तसेच तासिका तत्त्वावरील प्राध्यापकांच्या मानधनात वाढ करण्यात यावी, या प्रमुख मागण्यांसाठी नेट-सेट, पीएच.डी. धारक संघर्ष समितीने पुकारलेले आंदोलन अखेर उच्च व तंत्र शिक्षण मंत्री चंद्रकांत पाटील यांच्या आश्वासनानंतर स्थगित करण्यात आले आहे.

या संदर्भात संघर्ष समितीच्या शिष्टमंडळाची उच्च शिक्षण संचालकांसोबत सविस्तर बैठक पार पडली. बैठकीनंतर राज्याचे उच्च शिक्षण संचालक यांनी समितीच्या मागण्यांबाबत सकारात्मक भूमिका घेत लवकरच योग्य तो निर्णय घेण्यात येईल, असे लेखी आश्वासन दिले. त्यानंतर संघर्ष समितीने आंदोलन स्थगित करण्याचा निर्णय जाहीर केला.

बैठकीस डॉ. प्रमोद तांबे, डॉ. नारायण राजूरवार, डॉ. कांचन जोशी, डॉ. दीपक सुरवसे, प्रा. ओंकार कोरवले, डॉ. योगेश क्षीरसागर, डॉ. आदिनाथ डोके, डॉ. विशाल गायकवाड, प्रा. सचिन पवार, डॉ. पद्माकर घुले, प्रशांत कोल्हे आणि सुनील मोरे आदी उपस्थित होते.

संघर्ष समितीचे समन्वयक प्रा. जोतीराम सोरटे यांनी सांगितले, "उच्च व तंत्र शिक्षण मंत्री चंद्रकांत पाटील यांच्या आश्वासनानंतर आंदोलन स्थगित करण्यात आले आहे. शासन लवकरच सकारात्मक तोडगा काढेल, अशी अपेक्षा आहे. नवीन राष्ट्रीय शैक्षणिक धोरण २०२० प्रभावीपणे राबविण्यासाठी आवश्यक मनुष्यबळ उपलब्ध करून विद्यार्थ्यांच्या हिताचे निर्णय घेतले जातील, असा आम्हाला विश्वास आहे."

संघर्ष समितीने शासनाने दिलेल्या आश्वासनाची तातडीने अंमलबजावणी करून शिक्षकांच्या प्रलंबित मागण्यांवर सकारात्मक निर्णय घ्यावा, अशी अपेक्षा यावेळी आंदोलकांनी व्यक्त केली आहे.