JEE Main 2027 अर्जात मोठा बदल: चुकीचा अर्ज सुधारण्याची नवीन संधी
जेईई मेन 2027 ची तयारी करणाऱ्या विद्यार्थ्यांसाठी नॅशनल टेस्टिंग एजन्सीने (NTA) एक महत्त्वाची घोषणा केली आहे. आता उमेदवार सत्र 1 साठी नवीन अर्ज सादर करू शकतात. ज्यांना वाटते की त्यांच्या जुन्या अर्जात फोटो, सही किंवा इतर माहितीत चूक झाली आहे, ते हा पर्याय वापरू शकतात.
Eduvarta
एज्युवार्ता न्यूज नेटवर्क
जेईई मेन 2027 ची तयारी करणाऱ्या विद्यार्थ्यांसाठी नॅशनल टेस्टिंग एजन्सीने (NTA) एक महत्त्वाची घोषणा केली आहे. आता उमेदवार सत्र 1 साठी नवीन अर्ज सादर करू शकतात. ज्यांना वाटते की त्यांच्या जुन्या अर्जात फोटो, सही किंवा इतर माहितीत चूक झाली आहे, ते हा पर्याय वापरू शकतात. ज्यांनी आधीच अर्ज क्रमांक घेतला आहे किंवा फी भरली आहे, त्यांनाही ही सुविधा उपलब्ध आहे. मात्र NTA ने स्पष्ट केले आहे की फक्त ज्या अर्जाची फी यशस्वीरित्या भरली गेली आहे आणि ज्याचे कन्फर्मेशन पेज तयार झाले आहे, तोच अर्ज अंतिम व वैध मानला जाईल. त्यामुळे फी भरून कन्फर्मेशन पेज डाउनलोड करून ठेवणे आवश्यक आहे.
नवीन अर्ज भरल्यानंतर जुन्या अर्जाचे काय होईल, हा प्रश्न अनेक उमेदवारांना पडतो. NTA च्या मते, जर नवीन अर्ज सादर केला पण परीक्षा शुल्क जमा केले नाही किंवा कन्फर्मेशन पेज तयार झाले नाही, तर जुना अर्ज वैध राहतो. नवीन अर्ज भरताना नवीन अर्ज क्रमांक मिळतो आणि सर्व माहिती, फोटो, सही पुन्हा अपलोड करावी लागते. त्यामुळे घाई करू नका. आधी जुना अर्ज नीट तपासा. छोटी चूक असल्यास करेक्शन विंडोची वाट बघा आणि फक्त मोठी चूक असल्यासच नवीन अर्ज भरा.
सत्र 1 साठी अर्ज प्रक्रिया सुरू झाली असून शेवटची तारीख 22 नोव्हेंबर 2026 आहे. याआधी नियमित शुल्क भरून अर्ज पूर्ण करावा. NTA ने सोशल मीडियावर दिलेल्या माहितीनुसार, 10 नोव्हेंबरपर्यंत एकूण 6 लाख 70 हजार 182 उमेदवारांनी नोंदणी केली होती. त्यापैकी 4 लाख 90 हजार 8 जणांनी अर्ज सादर करून फी भरली आहे. अजूनही अनेक उमेदवार अर्ज पूर्ण करण्याच्या प्रक्रियेत आहेत. शेवटच्या दिवशी वेबसाइटवर गर्दी होऊ शकते, त्यामुळे वेळेवर अर्ज पूर्ण करणे फायदेशीर ठरेल.
JEE Main 2027 सत्र 1 ची परीक्षा 20, 21, 22, 23, 24 आणि 28 जानेवारी 2027 रोजी होणार आहे. परीक्षा वेगवेगळ्या शिफ्टमध्ये घेतली जाईल. हॉल तिकिटावर केंद्र, वेळ आणि शिफ्टची माहिती दिसेल. परीक्षा केंद्र कुठे आहे आणि किती वाजता पोहोचायचे आहे, हे आधीच तपासून ठेवा. NTA वर्षातून दोन सत्रांत परीक्षा घेते. इच्छुक उमेदवार एक किंवा दोन्ही सत्रांना बसण्याचा निर्णय घेऊ शकतात, असे स्पष्ट केले आहे.
