TET पेपरफुटी प्रकरण:सरकार ॲक्शन मोडवर;जॉइंट सीपी पंजाबराव उगलेंच्या नेतृत्वात SIT
SIT चे प्रमुख म्हणून पोलीस उपायुक्त पवन बनसोड काम पाहणार आहेत. पथकात २ सहाय्यक पोलीस आयुक्त, ९ अधिकारी (PI, API, PSI) आणि २० कर्मचारी समाविष्ट असतील. या रॅकेटच्या मुळापर्यंत पोहोचण्यासाठी पोलिसांची पथके दिल्लीसह विविध राज्यांत रवाना झाली आहेत.
eduvarta@gmail.com 
एज्युवार्ता न्यूज नेटवर्क
महाराष्ट्रात २८ जून रोजी होणाऱ्या शिक्षक पात्रता परीक्षेच्या (MahaTET) प्रश्नपत्रिकेच्या फुटीचा मोठा रॅकेट भिवंडी पोलिसांनी उघडकीस आणला आहे. या प्रकरणाची गांभीर्यता लक्षात घेऊन मुख्यमंत्री देवेंद्र फडणवीस (CM Devendra Fadanvis) यांनी तात्काळ ठाण्याचे सह-पोलीस आयुक्त पंजाबराव उगले (Joint CP Panjabrao Ugale) यांच्या अध्यक्षतेखाली विशेष तपास पथक (SIT) गठित करण्याचे आदेश दिले आहेत. दोषींवर कठोर कारवाई करण्याचे निर्देशही मुख्यमंत्र्यांनी दिले असून, त्यांनी शालेय शिक्षणमंत्री दादा भुसे (Dada Bhuse) यांच्याशी दूरध्वनीवर चर्चा केल्याचे समोर आले आहे.
या प्रकरणात कोनगाव पोलिसांनी धडक कारवाई करत तीन आरोपींना रंगेहाथ पकडले. भिवंडीतील गोपनीय माहितीवरून २७ जून रोजी पहाटे छापा टाकण्यात आला. आरोपींकडून TET २०२६ च्या प्रश्नपत्रिकेचे चार पूर्ण सेट जप्त करण्यात आले. शिक्षण विभागाच्या अधिकाऱ्यांनी पडताळणी केल्यानंतर हे जप्त केलेले पेपर मूळ असल्याची खात्री झाली. पोलिसांनी आरोपींकडून मोबाईल फोन, डेबिट-क्रेडिट कार्ड्सही जप्त केले आहेत.
अटक करण्यात आलेले तिन्ही आरोपी परराज्यातील असल्याचे पोलिस तपासात उघडकीस आले आहे. त्यातील एक हरियाणाचा तर दोघे बिहारचे रहिवासी आहेत. हे तिघे दिल्लीहून पेपर घेऊन भिवंडीत आले होते. पेपर विक्रीसाठी आरोपींनी १.५ कोटी रुपयांची आगाऊ रक्कम मागितली होती. हे पेपर वेगवेगळ्या रकमांमध्ये परीक्षार्थींना विकले जाणार होते. महाराष्ट्र राज्य परीक्षा परिषदेच्या वतीने राज्यभरात १०२८ केंद्रांवर ही परीक्षा घेण्याचे नियोजन होते. नीट परीक्षेतील गोंधळ लक्षात घेता सुरक्षा व्यवस्था कडक करण्यात आली होती. तरीही पेपरफुटी झाल्याने परीक्षा पुढे ढकलण्यात आली आहे.
SIT चे प्रमुख म्हणून पोलीस उपायुक्त पवन बनसोड काम पाहणार आहेत. पथकात २ सहाय्यक पोलीस आयुक्त, ९ अधिकारी (PI, API, PSI) आणि २० कर्मचारी समाविष्ट असतील. या रॅकेटच्या मुळापर्यंत पोहोचण्यासाठी पोलिसांची पथके दिल्लीसह विविध राज्यांत रवाना झाली आहेत. पोलिस मुख्य प्रश्नांची उत्तरं शोधणार आहेत. पेपर दिल्लीमधून कसा आला? शिक्षण विभागातील कोणत्या अधिकाऱ्यांचा सहभाग आहे का? हा पेपर आणखी कोण-कोणाला विकला गेला? यासह संपूर्ण रॅकेटचा सखोल तपास सुरू आहे.
