CET CELL: पीसीएम ग्रुपच्या सीईटी प्रश्नोत्तरांवर आजपासून आक्षेप नोंदवता येणार
विद्यार्थ्यांनी संबंधित प्रश्नाबाबत आवश्यक पुराव्यासह ऑनलाईन पद्धतीने आक्षेप सादर करावेत, असे आवाहन सीईटी कक्षाने केले आहे. प्रत्येक प्रश्न अथवा प्रत्येक आक्षेपासाठी निर्धारित शुल्क विद्यार्थ्यांना ऑनलाईन पद्धतीने भरावे लागणार आहे.
eduvarta@gmail.com 
एज्युवार्ता न्यूज नेटवर्क
राज्य सामाईक प्रवेश परीक्षा कक्षातर्फे शैक्षणिक वर्ष २०२६-२७ साठी घेण्यात आलेल्या पीसीएम ग्रुपच्या पहिल्या संधीच्या सीईटी प्रवेश परीक्षेतील प्रश्न व उत्तरांवर विद्यार्थ्यांना आजपासून (दि. २० मे) आक्षेप अर्थात हरकती नोंदविता येणार आहेत. विद्यार्थ्यांना २२ मे २०२६ पर्यंत ही सुविधा उपलब्ध राहणार असल्याची माहिती सीईटी कक्षाने दिली आहे.
पीसीएम समूहाची पहिल्या संधीची प्रवेश परीक्षा ११ एप्रिल ते २० एप्रिल २०२६ या कालावधीत राज्यभरात आठ दिवस दररोज दोन सत्रांमध्ये पार पडली. या परीक्षेसाठी राज्यातील ४ लाख ७९ हजार ३३४ विद्यार्थ्यांनी नोंदणी केली होती. त्यापैकी ४ लाख ५४ हजार ०७९ विद्यार्थ्यांनी प्रत्यक्ष परीक्षा दिली. परीक्षेची उपस्थिती ९४.७३ टक्के इतकी नोंदविण्यात आली.
सीईटी परीक्षा दिलेल्या विद्यार्थ्यांच्या लॉगिनमध्ये ‘ऑब्जेक्शन ट्रॅकर’ (Objection Tracker) हा पर्याय २० मे ते २२ मे या कालावधीत उपलब्ध करून देण्यात येणार आहे. या माध्यमातून विद्यार्थ्यांना परीक्षेतील कोणत्याही प्रश्नावर किंवा उत्तरावर आक्षेप नोंदविता येणार आहे.
विद्यार्थ्यांनी संबंधित प्रश्नाबाबत आवश्यक पुराव्यासह ऑनलाईन पद्धतीने आक्षेप सादर करावेत, असे आवाहन सीईटी कक्षाने केले आहे. प्रत्येक प्रश्न अथवा प्रत्येक आक्षेपासाठी निर्धारित शुल्क विद्यार्थ्यांना ऑनलाईन पद्धतीने भरावे लागणार आहे.
दरम्यान, ई-मेलद्वारे किंवा अन्य कोणत्याही माध्यमातून प्राप्त होणाऱ्या तक्रारी अथवा निवेदनांचा विचार केला जाणार नसल्याचेही स्पष्ट करण्यात आले आहे. त्यामुळे विद्यार्थ्यांनी दिलेल्या मुदतीतच आपल्या लॉगिनद्वारे आक्षेप नोंदवावेत, असे आवाहन राज्य सामाईक प्रवेश परीक्षा कक्षाने केले आहे.
