मोदींनी त्यांची डिग्री दाखवावी, मी माझ्या डिग्रीचा खर्च दाखवतो, अभिजीत दिपकेंचे पंतप्रधानांना खुले आव्हान

एज्युवार्ता न्यूज नेटवर्क

नीट पेपरफुटी प्रकरणात (NEET paper leak case) केंद्रीय शिक्षणमंत्री धर्मेंद्र प्रधानांनी राजीनामा दिल्यानंतर आता कोक्रोच जनता पार्टीचे (CJP) संस्थापक अभिजित दिपकेंच्या (Abhijit Deepke) मागे चौकशीचा ससेमीरा लागण्याची चिन्हे दिसू लागली आहेत. त्यांच्या अमेरिकेतील शिक्षणाच्या खर्चावरून वाद (Dispute over education expenses) निर्माण झाला आहे. या चौकशीच्या पार्श्वभूमीवर दिपकेंनी थेट पंतप्रधान नरेंद्र मोदींना टार्गेट करत खुले आव्हान (A challenge to PM Narendra Modi) दिले आहे. “पंतप्रधानांनी त्यांची डिग्री दाखवावी, मी अमेरिकेतील माझ्या शैक्षणिक खर्चाचा तपशील दाखवतो,” असे आव्हान दिपकेंनी दिले आहे.

अभिजित दिपकेंच्या वडिलांनी त्यांना शिक्षणासाठी अमेरिकेत पाठवण्यासाठी इतके पैसे कुठून आणले, असा सवाल उपस्थित करत सुरतच्या एका आरटीआय कार्यकर्त्याने आर्थिक चौकशीची मागणी केली होती. मात्र एका टेलिव्हिजन कार्यक्रमात दिपकेंनी यापूर्वीच परदेशातील शिक्षण शिष्यवृत्तीतून आणि कर्ज काढून पूर्ण केल्याचे स्पष्ट केले होते. तरीही या मुद्द्यावरून चर्चा सुरूच आहे.

पंतप्रधान नरेंद्र मोदींच्या डिग्रीवरून यापूर्वीही विरोधकांनी अनेकदा सरकारवर निशाणा साधला आहे. मात्र मोदींनी स्वत:हून डिग्रीसंदर्भात कोणतेही स्पष्टीकरण दिलेले नाही. ‘एन्टायर पॉलिटिकल सायन्स’ या विषयात पंतप्रधानांनी डिग्री केल्याची चर्चा असते. असा कोणताच विषय अभ्यासक्रमात नसताना ही डिग्री कोणत्या विद्यापीठातून घेतली, यावरून विरोधक नेहमीच प्रश्न उपस्थित करतात.

आता सीजेपीचे संस्थापक असलेल्या दिपकेंनीच पंतप्रधानांना डिग्री सार्वजनिक करण्याचे आव्हान दिल्याने नवा वाद पेटला आहे. पंतप्रधान नरेंद्र मोदी स्वत: जेन झी स्टाइल रीलद्वारे दिपकेंचे चॅलेंज स्वीकारून आपली डिग्री सार्वजनिक करतात का, हे पाहणे महत्त्वाचे ठरणार आहे. शैक्षणिक पात्रतेच्या पारदर्शकतेबाबतची ही चर्चा आता नव्या वळणावर पोहोचली आहे.