म. ए. सो. भावे प्राथमिक शाळेत गुरुपौर्णिमा व मातृपूजन सोहळा उत्साहात
विद्यार्थ्यांनी आपल्या आईचे औक्षण करून मातृपूजन केले. "आई हीच आपली पहिली गुरु" हा संस्कारमूल्यांचा संदेश या उपक्रमातून प्रभावीपणे देण्यात आला.
Eduvarta
एज्युवार्ता न्यूज नेटवर्क
महाराष्ट्र एज्युकेशन सोसायटीच्या भावे प्राथमिक शाळेत गुरुपौर्णिमेनिमित्त गुरुपौर्णिमा व मातृपूजन सोहळा उत्साहपूर्ण आणि संस्कारमय वातावरणात संपन्न झाला. या उपक्रमातून विद्यार्थ्यांमध्ये गुरूजन व पालकांप्रती आदर, कृतज्ञता आणि भारतीय संस्कृतीतील मूल्यांची जपणूक करण्याचा संदेश देण्यात आला.
कार्यक्रमाची सुरुवात शाळा समितीचे अध्यक्ष डॉ. दिलीप शेठ, महामात्रा डॉ. मानसी भाटे, मुख्याध्यापिका ललिता कारंडे आणि उपमुख्याध्यापिका वृषाली ठकार यांच्या हस्ते आद्यगुरू महर्षी व्यास यांच्या प्रतिमेचे पूजन करून झाली. यावेळी गुरुपरंपरेप्रती कृतज्ञता व्यक्त करण्यात आली.
यानंतर विद्यार्थ्यांनी आपल्या आईचे औक्षण करून मातृपूजन केले. "आई हीच आपली पहिली गुरु" हा संस्कारमूल्यांचा संदेश या उपक्रमातून प्रभावीपणे देण्यात आला. गुरुपौर्णिमेचे महत्त्व विद्यार्थ्यांना समजावून सांगण्यात आले. तसेच विद्यार्थ्यांनी गुरु-शिष्यांच्या कथा, गीतांचे सादरीकरण आणि पौराणिक तसेच आधुनिक गुरु-शिष्य जोड्यांचे आकर्षक सादरीकरण करून उपस्थितांची मने जिंकली.
विद्यार्थ्यांनी शिक्षकांचे पूजन करून त्यांच्याप्रती आदर व कृतज्ञता व्यक्त केली. तसेच स्वतःच्या हस्ते तयार केलेली आकर्षक भेटकार्डे आई व शिक्षकांना भेट दिली. आई आणि शिक्षकांविषयीच्या प्रेम, आदर व कृतज्ञतेच्या भावना व्यक्त करणारी विद्यार्थ्यांची पत्रे आणि हस्तनिर्मित भेटकार्डांचे प्रदर्शनही भरविण्यात आले. या उपक्रमाचे उपस्थित पालक, मान्यवर आणि शिक्षकांनी विशेष कौतुक केले.
मुख्याध्यापिका सौ. ललिता कारंडे आणि उपमुख्याध्यापिका सौ. वृषाली ठकार यांनी विद्यार्थ्यांच्या उत्स्फूर्त सहभागाचे, आत्मविश्वासपूर्ण सादरीकरणाचे आणि उपक्रमातून व्यक्त झालेल्या संस्कारमूल्यांचे विशेष अभिनंदन केले.
कार्यक्रमाला शिक्षक, पालक आणि विद्यार्थ्यांचा उत्स्फूर्त प्रतिसाद लाभला. गुरुभक्ती, मातृभक्ती आणि गुरुजनांप्रती आदरभाव जागविणारा हा संस्कारमय सोहळा उपस्थितांच्या कायम स्मरणात राहील, अशी भावना यावेळी व्यक्त करण्यात आली.
