बी.एड.कॉलेजमध्ये स्वायत्तता मिळणारे हे कॉलेज ठरले पहिले ; UGC कडून अधिकृत मान्यता
सावित्रीबाई फुले पुणे विद्यापीठाशी संलग्न सुमारे ८० बी.एड. कॉलेजांमध्ये स्वायत्तता मिळवणारे हे कॉलेज पहिले ठरले आहे.तसेच या संस्थेच्या स्वायत्त कॉलेजची एकूण संख्या ९ वर गेली आहे.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठाशी संलग्न असलेल्या पुण्यातील शिवाजीनगर येथील प्रोग्रेसिव्ह एज्युकेशन सोसायटीच्या (PES) बी.एड. महाविद्यालयाला विद्यापीठ अनुदान आयोगाने (UGC) स्वायत्त (Autonomous) दर्जा प्रदान केला आहे. पुणे विद्यापीठाशी संलग्न असलेल्या सुमारे ८० बी.एड. महाविद्यालयांपैकी स्वायत्तता मिळवणारे हे पहिलेच बी.एड. कॉलेज ठरले असून, यामुळे प्रोग्रेसिव्ह एज्युकेशन सोसायटीच्या एकूण स्वायत्त महाविद्यालयांची संख्या आता ९ वर पोहोचली आहे.
विद्यापीठ अनुदान आयोगाच्या (UGC) ६ जुलै २०२६ रोजी पार पडलेल्या बैठकीत 'स्टँडिंग कमिटी ऑन ऑटोनॉमस कॉलेजेस'च्या शिफारशींना मंजुरी देण्यात आली. UGC नियमन २०२३ च्या कलम ७.५ नुसार शैक्षणिक वर्ष २०२६-२७ ते २०३५-३६ या १० वर्षांच्या कालावधीसाठी हा दर्जा देण्यात आला आहे. या निर्णयाची अधिकृत अधिसूचना पुढील ३० दिवसांत जारी करण्याचे निर्देश यूजीसीने सावित्रीबाई फुले पुणे विद्यापीठाला दिले आहेत.
विद्यार्थ्यांना काय फायदा होणार?
स्वायत्ततेचा दर्जा मिळाल्यामुळे आता या महाविद्यालयाला:
शिक्षणातील बदलत्या प्रवाहांनुसार स्वतःचा आधुनिक व रोजगाराभिमुख अभ्यासक्रम तयार करता येईल.
परीक्षा पद्धती आणि मूल्यांकनात नाविन्यपूर्ण बदल घडवून आणता येतील.
शैक्षणिक व प्रशासकीय गुणवत्ता उंचावण्यासाठी स्वतंत्रपणे निर्णय घेण्याचे अधिकार मिळतील.
*UGC च्या अटींचे पालन बंधनकारक*
स्वायत्त दर्जा मिळाल्यानंतर महाविद्यालयाला 'UGC स्वायत्त संस्था नियमन २०२३' मधील सर्व अटी व शर्तींचे पालन करावे लागणार आहे. नियमांचे उल्लंघन झाल्यास कलम १३ अंतर्गत कारवाईची तरतूद आहे. तसेच १० वर्षांचा कालावधी संपण्याच्या किमान तीन महिने आधी महाविद्यालयाला मुदतवाढीसाठी UGC कडे पुनर्रचना अर्ज करावा लागेल.
--------------------------------------------------------
खासगी विद्यापीठांचा पर्याय स्वीकारण्यापेक्षा स्वायत्त महाविद्यालयांमधून सुद्धा विद्यार्थ्यांना नवनवीन आणि कालसुसंगत अभ्यासक्रम उपलब्ध करून देता येतात. स्वयत्तता मिळालेले प्रोग्रेसिव्ह एज्युकेशन सोसायटीचे हे नववे महाविद्यालय आहे.शिक्षणाचे पावित्र राखण्याचे काम या महाविद्यालयांकडून केले जात आहे.
-डॉ. गजानन एकबोटे, कार्याध्यक्ष, प्रोग्रेसिव्ह एज्युकेशन सोसायटी,
