१२ वी नंतर थेट ५ वर्षांची पदवी! डेक्कन कॉलेजमध्ये 'भारतविद्या' अभ्यासक्रमाची सुरुवात
या अभ्यासक्रमासाठी बारावी उत्तीर्ण विद्यार्थी पात्र असतील. अभ्यासक्रमाच्या यशस्वी अंमलबजावणीसाठी राज्य सरकारकडे दहा कोटी रुपयांचा 'सीडफंड' मागण्यात आला आहे. येत्या २० जुलै रोजी प्रवेश प्रक्रिया, अभ्यासक्रम रचना आणि इतर महत्त्वाच्या सूचना डेक्कन कॉलेजच्या अधिकृत वेबसाइटवर प्रसिद्ध करण्यात येणार आहेत.
Eduvarta
0
एज्युवार्ता न्यूज नेटवर्क
पुरातत्त्व, भाषाविज्ञान आणि भारतीय संस्कृतीच्या अभ्यासासाठी प्रसिद्ध असलेल्या डेक्कन कॉलेज अभिमत विद्यापीठाने (University of Deccan College) यंदापासून नवीन अभ्यासक्रमाची घोषणा (Announcement of the new curriculum) केली आहे. बारावीनंतर थेट पाच वर्षांचा 'भारतविद्या' हा एकात्मिक आंतरविद्याशाखीय अभ्यासक्रम (Direct five-year course after Class 12) सुरू होणार आहे. राष्ट्रीय शैक्षणिक धोरण २०२० (NEP 2020) नुसार राबवल्या जाणाऱ्या या अभ्यासक्रमात विद्यार्थ्यांना पदवी, ऑनर्स आणि पदव्युत्तर पदवी मिळवण्याची संधी एकाच वेळी उपलब्ध होणार आहे. या अभ्यासक्रमासाठी २० जागा उपलब्ध असतील. डेक्कन कॉलेजचे कुलपती डॉ. भूषण पटवर्धन (Chancellor Dr. Bhushan Patwardhan) यांनी पत्रकार परिषदेत ही माहिती दिली आहे.
दोनशे वर्षांची समृद्ध शैक्षणिक परंपरा असलेल्या या संस्थेत प्रथमच बारावीनंतरचा अभ्यासक्रम सुरू होत असल्याचे त्यांनी सांगितले. भारतीय ज्ञानपरंपरा, संस्कृती, भाषा आणि आधुनिक विज्ञान यांचा सुंदर समन्वय साधणारा हा अभ्यासक्रम विद्यार्थ्यांना समग्र दृष्टीकोन देणार आहे. प्रभारी कुलगुरू डॉ. प्रसाद जोशी यांच्या उपस्थितीत ही घोषणा करण्यात आली.
या अभ्यासक्रमासाठी बारावी उत्तीर्ण विद्यार्थी पात्र असतील. अभ्यासक्रमाच्या यशस्वी अंमलबजावणीसाठी राज्य सरकारकडे दहा कोटी रुपयांचा 'सीडफंड' मागण्यात आला आहे. येत्या २० जुलै रोजी प्रवेश प्रक्रिया, अभ्यासक्रम रचना आणि इतर महत्त्वाच्या सूचना डेक्कन कॉलेजच्या अधिकृत वेबसाइटवर प्रसिद्ध करण्यात येणार आहेत. विद्यार्थ्यांना आकर्षित करण्यासाठी आधुनिक पाठ्यक्रम आणि अनुभवात्मक शिक्षणावर भर देण्यात आला आहे.
'एनईपी' अंतर्गत राज्यातील 'आभा महाराष्ट्र' ज्ञानसमूहाची निर्मिती होणार असून, त्याचे नेतृत्व डेक्कन कॉलेज करेल. मुंबई विद्यापीठ, सावित्रीबाई फुले पुणे विद्यापीठ, डॉ. बाबासाहेब आंबेडकर मराठवाडा विद्यापीठ, राष्ट्रसंत तुकडोजी महाराज नागपूर विद्यापीठ आणि एसएनडीटी महिला विद्यापीठ या संस्था संस्थापक भागीदार म्हणून सहभागी होणार आहेत. पहिल्या टप्प्यात अभ्यासक्रम विकास आणि प्राध्यापक प्रशिक्षणाची जबाबदारी डेक्कन कॉलेजकडे राहील.
डेक्कन कॉलेजने पदव्युत्तर आणि संशोधन केंद्र म्हणून ख्याती मिळवली आहे. आता प्रथमच पदवी स्तरावरील अभ्यासक्रम सुरू करत संस्थेने विद्यार्थी केंद्रित पाऊल उचलले आहे. 'भारतविद्या' अभ्यासक्रमामुळे विद्यार्थ्यांना भारतीय वारशाचे आधुनिक दृष्टिकोनातून अध्ययन करता येईल. या अभ्यासक्रमाला चांगला प्रतिसाद मिळेल, अशी अपेक्षा शिक्षण क्षेत्रात व्यक्त होत आहे.
