बापरे! IIM च्या विद्यार्थ्याला तब्बल ६९ लाख रुपयांचे पॅकेज..

एज्युवार्ता न्यूज नेटवर्क 

नागपूरच्या इंडियन इन्स्टिट्यूट ऑफ मॅनेजमेंट (IIM Nagpur) मधील एका विद्यार्थ्याला तब्बल ६९ लाख रुपयांचे पॅकेज (Package worth Rs 69 lakh) मिळाले आहे. हे आयआयएम मधील आतापर्यंतचे सर्वाधिक पॅकेज आहे. आयआयएम नागपूरचा ९वा वार्षिक पदवी प्रदान समारंभ (9th Annual Graduation Ceremony) रविवारी पार पडला. यंदा एकूण ३२९ विद्यार्थ्यांना पदवी प्रदान करण्यात आली. यामध्ये २६७ विद्यार्थी फ्लॅगशिप एमबीए प्रोग्रामचे, ६२ विद्यार्थी नागपूर व पुणेच्या एक्झिक्युटिव्ह एमबीए प्रोग्रामचे, तर १० विद्यार्थी आंतरराष्ट्रीय ड्युअल डिग्री प्रोग्रामचे होते. यात ६९ लाखाचे पॅकेज प्राप्त करणाऱ्या विद्यार्थ्याचाही समावेश आहे. 

आयआयएम नागपूरच्या पदवी प्रदान समारंभात शैक्षणिक उत्कृष्टतेसाठी स्वाती सिंग, तर फ्लॅगशिप एमबीए प्रोग्राममध्ये सर्वांगीण उत्कृष्टतेसाठी अनंत जैन याला सुवर्ण पदक देण्यात आले. पुणे बॅचमधून दुष्यंत जैन आणि नागपूर बॅचमधून विराज वोडितेल यांना एक्झिक्युटिव्ह एमबीए प्रोग्राममध्ये शैक्षणिक उत्कृष्टतेसाठी सुवर्ण पदक प्रदान करण्यात आले. 

या पदवी प्रदान समारंभाला बोर्ड ऑफ गव्हर्नर्सचे अध्यक्ष सी. पी. गुरनानी उपस्थित होते. 'जर तुम्ही उद्दिष्टाचे पालन करता, तर यश हे केवळ एक परिणाम असेल. दृष्टिकोन आणि हेतू नसलेली मेहनत फार काळ टिकत नाही. आता तुमच्यासाठी नेतृत्व करण्याची, नवीन मापदंड स्थापित करण्याची आणि प्रगतीशील मानसिकता स्वीकारण्याची वेळ आहे, असे गुरनानी म्हणाले. 

गेल्या पाच वर्षांत संस्थेच्या उत्पन्नात ४०.८२ टक्के वाढ झाली असून निव्वळ मूल्यांत ४५३.८ टक्के वाढ झाली आहे. यंदा एमबीए प्रोग्रामसाठी १०० टक्के प्लेसमेंट झाले असून त्यामध्ये चार आंतरराष्ट्रीय प्लेसमेंटचाही समावेश आहे. अंतिम प्लेसमेंटसाठी यावर्षी ८९ नवीन भरती करणाऱ्या कंपन्यांनी सहभाग घेतला. यापैकी चार विद्यार्थ्यांना आंतरराष्ट्रीय कंपनीने पाचारण केले असून एका विद्यार्थ्याला सर्वाधिक ६९.५७ लाखाचे पॅकेज दिले गेले आहे, असे आयआयएम नागपूरचे संचालक डाॅ. भीमराय मैत्री म्हणाले