विमलाबाई गरवारे हायस्कूलमध्ये पर्यावरणपूरक रांगोळी स्पर्धा उत्साहात

एज्युवार्ता न्यूज नेटवर्क 

 विमलाबाई गरवारे हायस्कूलमध्ये इयत्ता ११ वी व १२ वी विज्ञान आणि वाणिज्य शाखेतील विद्यार्थ्यांसाठी पर्यावरणपूरक रांगोळी स्पर्धेचे आयोजन करण्यात आले होते. या स्पर्धेचे वैशिष्ट्य म्हणजे रांगोळी तयार करण्यासाठी केवळ फुले आणि पानांचा वापर करण्यात आला. विद्यार्थ्यांनी या स्पर्धेत मोठ्या उत्साहाने आणि उत्स्फूर्तपणे सहभाग नोंदविला.

या स्पर्धेत मुलींनी जसा उत्स्फूर्त प्रतिसाद दिला, तसाच उत्साह मुलांनीही दाखविला. विद्यार्थ्यांच्या कल्पकतेला आणि सर्जनशीलतेला या स्पर्धेमुळे व्यासपीठ मिळाले. विशेषतः मुलांच्या डोक्यातील नाविन्यपूर्ण कल्पना विविध आकर्षक रांगोळ्यांच्या माध्यमातून समोर आल्या. सर्वच रांगोळ्या आकर्षक आणि पाहण्यासारख्या असल्याने परीक्षकांना गुणांकन करताना मोठी कसरत करावी लागली. अत्यंत कमी गुणांच्या फरकाने विजेत्यांची निवड करण्यात आली.

प्रशालेचे मुख्याध्यापक भारमाळ सर यांनी सर्व सहभागी विद्यार्थ्यांचे कौतुक करून त्यांचे अभिनंदन केले. स्पर्धेच्या यशस्वी आयोजनासाठी जोशी मॅडम तसेच इतर सर्व सहकारी शिक्षकांचे मोलाचे सहकार्य लाभले. स्पर्धेचे परीक्षण प्रशालेतील राजपूत मॅडम आणि कोकरे सर यांनी केले.

मुली व मुलांचे निकाल स्वतंत्रपणे जाहीर करण्यात आले. मुलींच्या गटात प्राचीती-मयुरी (A12) यांनी प्रथम क्रमांक पटकावला, तर रितिका-सुकन्या (A8) यांनी द्वितीय क्रमांक मिळविला. तृतीय क्रमांक विभागून राधा-ईश्वरी (A9) आणि नेहा-श्रुतिका (A3) यांना देण्यात आला. उत्तेजनार्थ क्रमांक माधवी-तनिष्का (A5) आणि पूर्वा-ईश्वरी (A13) यांनी मिळविला.

मुलांच्या गटात दुर्गेश (A6) याने प्रथम क्रमांक पटकावला, तर शिवम-शुभम (A4) यांनी द्वितीय क्रमांक मिळविला.

या पर्यावरणपूरक उपक्रमामुळे विद्यार्थ्यांमध्ये पर्यावरणाबाबत जागरूकता निर्माण होण्यासोबतच त्यांची कला, सर्जनशीलता आणि नाविन्यपूर्ण विचारांना वाव मिळाला.