सेट परीक्षेचा अर्ज भरला का? शेवटचा दिवस बाकी; १ लाखाहून अधिक उमेदवारांची नोंदणी 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या सेट विभागातर्फे महाराष्ट्र व गोवा राज्यातील उमेदवारांसाठी येत्या 26 जुलै 2026 रोजी घेतल्या जाणाऱ्या सेट परीक्षेसाठी आतापर्यंत 1 लाख 17 हजार उमेदवारांनी नोंदणी केली आहे. परीक्षा अर्ज भरण्यासाठी 7 जुलै हा अंतिम दिवस असून अद्याप ज्या उमेदवारांनी नोंदणी केली नाही, त्यांना ऑनलाईन परीक्षा अर्ज भरण्याची शेवटची संधी आहे.

राज्यातील CHB प्राध्यापकांच्या जागा कमी झाल्या असू पूर्ण प्राध्यापक पदाची भरती प्रक्रिया प्रक्रिया अद्याप सुरू झाली नाही. नेट, सेट, पीएचडी पदवी घेऊनही अनेकांना चांगले दिवस आले नाही.एकूणच प्राध्यापकांवर तुटपुंजा मानधनावर काम करण्याची वेळ आली आहे,असे असले तरी सेट परीक्षेला अर्ज करणाऱ्या उमेदवारांची संख्या कमी झाली नाही. उमेदवारांना येत्या 7 जुलैपर्यंत विलंब शुल्कासह अर्ज भरता येणार आहे.

सेट परीक्षा अर्ज भरण्यासाठी दिनांक 27 जून 2026 ते 3 जुलै, 2026 अशी विनाविलंब शुल्क मुदत देण्यात आली होती. तसेच 4 जुलै 2026 ते 7 जुलै 2026 अशी विलंब शुल्कासहित मुदतवाढ देण्यात आली. तसेच विशेष मागास प्रवर्गाच्या ज्या विद्यार्थ्यांनी विशेष मागास प्रवर्गाव्यतिरीक्त इतर प्रवर्गातून सेट परीक्षा अर्ज भरले आहेत, अशा विद्यार्थ्यांना त्यांच्या अर्जात संवर्ग दुरुस्त करण्यासाठी दिनांक ८ जुलै, २०२६ ते १० जुलै, २०२६ अशी मुदत देण्यात येत आहे.  विशेष मागास प्रवर्ग (SBC) या प्रवर्गाच्या संभाव्य आरक्षणाबाबत शासनाचे या संबंधीचे आदेश व मार्गदर्शन तसेच मा. उच्च न्यायालयाच्या संभाजीनगर खंडपीठातील याचिका क्र. ५८८५ च्या अधीन राहून कार्यवाही करण्यात येईल, असे सेट विभागातर्फे स्पष्ट करण्यात आले आहे.

सेट विभागाकडे आतापर्यंत 1 हजार 17 हजार 114 उमेदवारांनी नोंदणी केली आहे. त्यातील 1 लाख 11 हजार 116 उमेदवारांनी परीक्षा शुल्क भरले आहे, असे विद्यापीठाच्या सेट विभागाचे समन्वयक डॉ.प्रभाकर देसाई यांनी सांगितले.