सी.टी. बोरा कॉलेजच्या 152 विद्यार्थ्यांना TCS कंपनीमध्ये रोजगाराची संधी
महाविद्यालयातील बीए, बी.कॉम. बीएससी, बीबीए आदी अभ्यासक्रमाच्या सुमारे 400 विद्यार्थ्यांनी सहभाग घेतला. त्यात या बहुराष्ट्रीय नामांकित कंपनीमध्ये 152 विद्यार्थ्यांची निवड करण्यात आली.
eduvarta@gmail.com 
एज्युवार्ता न्यूज नेटवर्क
केवळ शहरी भागातील महाविद्यालयांमध्ये विद्यार्थ्यांना टाटा कन्सल्टन्सी सर्विसेस (TCS) सारख्या नामांकित कंपन्यांमध्ये रोजगाराच्या संधी उपलब्ध होत नाहीत तर ग्रामीण भागातील विद्यार्थ्यांना सुद्धा या कंपनीत नोकरी मिळू शकते, ही बाब सत्यात उतरली आहे. शिरूर येथील सी.टी. बोरा महाविद्यालयातील (C.T. Bora College)एकूण 152 विद्यार्थ्यांना टीसीएस कंपनीमध्ये रोजगाराची संधी प्राप्त झाली आहे.
शिरूर परिसरातील सी.टी. बोरा या नामांकित महाविद्यालयांमध्ये प्रामुख्याने ग्रामीण भागातील विद्यार्थी शिक्षण घेतात. या महाविद्यालयाच्या प्लेसमेंट विभागातर्फे रोजगार मेळाव्याच्या आयोजन करण्यात आले होते. त्यात महाविद्यालयातील बीए, बी.कॉम. बीएससी, बीबीए आदी अभ्यासक्रमाच्या सुमारे 400 विद्यार्थ्यांनी सहभाग घेतला. त्यात या बहुराष्ट्रीय नामांकित कंपनीमध्ये 152 विद्यार्थ्यांची निवड करण्यात आली.
महाविद्यालयाच्या प्लेसमेंट सेलच्या माध्यमातून इन्फोसिस, विप्रो, आयसीआयसीआय बँक यांसह इतर नामांकित कंपन्या व बँकांना सातत्याने आमंत्रित करण्यात येते. महाविद्यालयाचे प्राचार्य डॉ.के.सी. मोहिते व उपप्राचार्य प्रा.एच.एस.जाधव यांच्या मार्गदर्शनाखाली प्लेसमेंट सेलचे प्रमुख व समन्वयक डॉ.योगेश सेठी यांच्या नेतृत्वाखाली हा उपक्रम आयोजित करण्यात आला होता.
नववर्षाच्या सुरुवातीलाच रोजगाराची संधी प्राप्त झाल्यामुळे विद्यार्थ्यांनी आनंद व्यक्त केला. कार्यक्रमाच्या संयोजनासाठी अजित चंदनशिवे, बिरोबा बेळे, तुषार डाळिंबकर, अमोल पितळे, किरण टाकसाळे, मंजुषा पाटील आदी प्राध्यापकांनी प्रयत्न केले. महाविद्यालयाच्या नियमक मंडळाचे अध्यक्ष प्रकाश धारीवाल, संस्थेचे अध्यक्ष धरमचंद फुलफगर, सचिव प्रा. नंदकुमार निकम संस्थेच्या प्लेसमेंट सेलचे अभिनंदन केले व विद्यार्थ्यांना पुढील वाटचालीसाठी शुभेच्छा दिल्या.
