सुंदरबाई मराठे विद्यालयात ‘मराठी राजभाषा दिन’ उत्साहात साजरा

एज्युवार्ता न्यूज नेटवर्क 

पुण्यातील खराडी येथील सुंदरबाई मराठे विद्यालय येथे 'मराठी राजभाषा दिन' अत्यंत उत्साहात आणि सांस्कृतिक वातावरणात साजरा करण्यात आला. ज्ञानपीठ पुरस्कार विजेते कवी कुसुमाग्रज यांच्या जयंतीनिमित्त त्यांच्या प्रतिमेला पुष्पहार अर्पण करून विविध सांस्कृतिक कार्यक्रम घेण्यात आले.या कार्यक्रमात विद्यार्थ्यांनी मराठी संस्कृतीचे दर्शन घडवणारे विविध कलाप्रकार सादर करून  मराठी भाषेचा संपूर्ण प्राचीन काळापासूनचा इतिहास मांडला.

या प्रसंगी विद्यालयातील विद्यार्थ्यांनी मराठी भाषेची समृद्धी दर्शवणारे अभंग, गवळण आणि भारूड सादर केले. इतकेच नव्हे तर, बदलत्या काळाचा वेध घेणारी विनोदी पत्रे आणि खुसखुशीत उखाणे सादर करून विद्यार्थ्यांनी कार्यक्रमात हशा पिकवला. महाराष्ट्राची लोककला आणि परंपरा या सादरीकरणातून प्रभावीपणे मांडण्यात आली.
कार्यक्रमाचे अध्यक्ष आणि विद्यालयाचे मुख्याध्यापक संजय सोमवंशी यांनी आपल्या मार्गदर्शनात मराठी भाषेचे महत्त्व अधोरेखित केले.

संजय सोमवंशी म्हणाले, "मराठी ही केवळ संवादाची भाषा नसून ती आपली संस्कृती आणि अस्मिता आहे. विद्यार्थ्यांनी आपल्या मातृभाषेचा अभिमान बाळगायला हवा आणि वाचन संस्कृती जोपासली पाहिजे." आपल्या समृद्ध परंपरेचा वारसा नव्या पिढीने पुढे न्यावा, असे आवाहनही त्यांनी या वेळी केले.

कार्यक्रमाचे प्रास्ताविक मराठी विभाग प्रमुख संदीप लिमगुडे यांनी केले, तर पर्यवेक्षक  सुनील वळसे यांनी विद्यार्थ्यांच्या कलागुणांचे कौतुक करत त्यांना शुभेच्छा दिल्या. हा कार्यक्रम यशस्वी करण्यासाठी मराठी विषय शिक्षक  माया तळेकर, दीपक सोनवणे आणि मोना शेलार यांनी मोलाचे मार्गदर्शन केले.

संपूर्ण कार्यक्रमाचे नेटके आणि प्रभावी सूत्रसंचालन  विद्यालयातील  अनुष्का बाबर हिने आपल्या ओघवत्या शैलीत केले. या सोहळ्यामुळे विद्यालयाचे वातावरण मराठीमय झाले होते. याप्रसंगी संस्थेचे संस्थापक अध्यक्ष रामभाऊ मोझे, उपाध्यक्ष  ज्ञानेश्वर मोझे,संजय मोझे तसेच शालेय समितीचे अध्यक्षा प्रा. अलकाताई पाटील यांनी सर्व विद्यार्थी आणि शिक्षकांना मराठी दिनाच्या शुभेच्छा दिल्या.तसेच मोठ्या संख्येने विद्यार्थी आणि शिक्षक या कार्यक्रमाला उपस्थित होते.