11th Admission : विद्यार्थ्यांना आजपासून नोंदवता येणार महाविद्यालयांचा पसंतीक्रम

एज्युवार्ता न्यूज नेटवर्क 

राज्यातील इयत्ता अकरावीच्या (11th Admission) केंद्रीकृत ऑनलाइन प्रवेश प्रक्रियेत शिक्षण संचालनालयाने वेळापत्रक जाहीर (Schedule Announced) केले असून, बहुप्रतिक्षित नियमित CAP फेरी-१ आज गुरुवार दि. २१ मे २०२६ पासून सुरू झाली आहे. विद्यार्थ्यांना आजपासून महाविद्यालयांचा पसंतीक्रम (Order of College Preference) नोंदविता येणार आहे. विद्यार्थ्यांना अर्जाचा भाग-१ आणि भाग-२ भरण्याची प्रक्रिया पूर्ण करता येणार आहे. 

संपूर्ण प्रवेश प्रक्रिया पूर्णपणे ऑनलाइन पद्धतीने पारदर्शक रीतीने राबवली जाणार असल्याचे शिक्षण विभागाने स्पष्ट केले आहे. झिरो राउंड (व्यवस्थापन, इन-हाऊस आणि अल्पसंख्याक कोटा) प्रक्रिया यशस्वीरित्या पूर्ण झाली असून, त्यात सुमारे ६ हजार जागांवर प्रवेश निश्चित झाले आहेत. या राउंडनंतर रिक्त राहिलेल्या जागांसाठी आता नियमित CAP फेरी-१ सुरू करण्यात आली असल्याची माहिती देण्यात आली आहे. 

विद्यार्थ्यांना किमान १ ते कमाल १० कनिष्ठ महाविद्यालयांचे पसंतीक्रम २१ व २२ मे २०२६ दरम्यान  नोंदविता येणार आहे. या कालावधीत फेरी-१ साठी Part 1 आणि Part 2 अर्ज भरता देखील येणार आहे. २३ ते २६ मे या कालावधीत विद्यार्थ्यांना जागा वाटप केल्या जातील. २६ मे रोजी पहिली यादी जाहीर करण्यात येईल. २६ ते २८ मे रोजी ज्या विद्यार्थ्यांना महाविद्यालय अलॉट होईल, त्यांना संबंधित महाविद्यालयात जाऊन प्रवेश निश्चित करावा लागेल. २९ मे २०२६ रोजी पहिल्या फेरीनंतर रिक्त राहिलेल्या जागांचा तपशील जाहीर केला जाईल. 

शिक्षण विभागाने विद्यार्थ्यांना आणि पालकांना वेळेचा योग्य वापर करण्याचे आवाहन केले आहे. गुणवत्तेनुसार, कॉलेजचे स्थान, स्ट्रीम (Science/Commerce/Arts) आणि उपलब्ध सुविधा विचारात घेऊन https://mahafyjcadmissions.in/ या संकेतस्थळावर जाऊन पसंतीक्रम भरावा. अडचण आल्यास हेल्पलाइन क्रमांक ८५३०९५५५६४ वर संपर्क साधावा. ही प्रक्रिया संपूर्ण महाराष्ट्रातील सर्व जिल्ह्यांसाठी लागू असून, यामुळे विद्यार्थ्यांना न्याय्य आणि पारदर्शक प्रवेश मिळेल, अशी अपेक्षा व्यक्त होत आहे. अधिक माहितीसाठी अधिकृत वेबसाइट नियमित तपासण्याचे आवाहन केले आहे.