नवीन अभियांत्रिकी महाविद्यालये 'या' जिल्ह्यात होणार सुरू; शासनाकडून बृहत् आराखडा मंजूर
या आराखड्यानुसार राज्यातील गडचिरोली, नंदुरबार, हिंगोली, वाशिम, धाराशिव, सिंधुदुर्ग आणि परभणी या जिल्ह्यांमध्ये प्राधान्याने अभियांत्रिकी महाविद्यालये सुरू करण्यास परवानगी देण्यात येणार आहे.
eduvarta@gmail.com 
एज्युवार्ता न्यूज नेटवर्क
राज्याचे मुख्यमंत्री देवेंद्र फडणवीस यांच्या अध्यक्षतेखाली मुंबई मंत्रालय नुकत्याच पार पडलेल्या महाराष्ट्र राज्य उच्च शिक्षण व विकास आयोगाच्या (माहेड) बैठकीत डॉ. बाबासाहेब आंबेडकर तंत्रशास्त्र विद्यापीठाचा (BATU) 2025 ते 2031 या कालावधीसाठीचा बृहत् आराखडा मंजूर करण्यात आला.तसेच शैक्षणिक वर्ष 2027–28 ते 2030–31 या कालावधीत राज्यात नवीन बी.फार्मसी आणि डी.फार्मसी अभ्यासक्रमांच्या संस्था सुरू न करण्याचा तसेच विद्यमान संस्थांची प्रवेशक्षमता वाढवू नये, अशी शिफारस केंद्र सरकार आणि फार्मसी कौन्सिल ऑफ इंडिया यांना कळविण्यात येणार असल्याचेही स्पष्ट करण्यात आले.
या आराखड्यानुसार राज्यातील गडचिरोली, नंदुरबार, हिंगोली, वाशिम, धाराशिव, सिंधुदुर्ग आणि परभणी या जिल्ह्यांमध्ये प्राधान्याने अभियांत्रिकी महाविद्यालये सुरू करण्यास परवानगी देण्यात येणार आहे. तसेच याच जिल्ह्यांमध्ये बी.व्होक अभ्यासक्रमांची महाविद्यालयेही सुरू करण्याचा निर्णय घेण्यात आला आहे.
धाराशिव आणि परभणी येथे वास्तुशास्त्र अभ्यासक्रमांची महाविद्यालये, तर नंदुरबार आणि सिंधुदुर्ग येथे एचएमसीटी (HMCT) अभ्यासक्रमांची महाविद्यालये सुरू करण्यास प्राधान्य दिले जाणार आहे.
विद्यापीठाने प्रवेश क्षमतेवर मर्यादा ठेवणे, अभ्यासक्रम उद्योगाभिमुख करणे तसेच प्रयोगशाळा आणि संशोधनासाठी उद्योगांशी भागीदारी वाढवणे यावर भर द्यावा, असे निर्देश बैठकीत देण्यात आले. शिक्षण व उद्योग क्षेत्रातील दरी कमी करण्यासाठी औषधनिर्माण क्षेत्रातील कंपन्यांसोबत सहकार्य वाढवून विद्यार्थ्यांना इंटर्नशिप, प्रात्यक्षिके आणि संशोधनाच्या अधिक संधी उपलब्ध करून देण्यावर भर देण्यात आला.
या बैठकीस राज्याचे उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, उच्च व तंत्र शिक्षण मंत्री चंद्रकांत पाटील, चंद्रशेखर बावनकुळे, मंगलप्रभात लोढा, उदय सामंत, राज्यमंत्री ॲड. आशिष जयस्वाल, राज्यमंत्री इंद्रनील नाईक तसेच वरिष्ठ अधिकारी उपस्थित होते.
