मोठी बातमी: TET परीक्षेच्या तारखेत बदल; परीक्षा परिषद आयुक्तांची घोषणा
नीट परीक्षेचा पेपर फुटल्यामुळे नीट परीक्षा येत्या 21 जून रोजी पुन्हा नव्याने आयोजित केली जाणार आहे. नॅशनल टेस्टिंग एजन्सीने देशभरातील विविध परीक्षा केंद्र नीट परीक्षेसाठी घेतले आहेत. NEET व TET या दोन्ही परीक्षांसाठी बहुतांशी एकच केंद्र असल्यामुळे टीईटी परीक्षा विद्यार्थी हित लक्षात घेता पुढे ढकलण्यात आली आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य परीक्षा परिषदेतर्फे घेतल्या जाणाऱ्या महाराष्ट्र शिक्षक पात्रता परीक्षा अर्थात MAHATET परीक्षेच्या तारखेत बदल करण्यात आला आहे. 21 जून ऐवजी आता टीईटी परीक्षा 28 जून रोजी घेतली जाणार आहे. राज्य परीक्षा परिषदेच्या आयुक्त अनुराधा ओक यांनी याबाबतचे पत्रक प्रसिद्ध केले आहे.
सर्वोच्च न्यायालयाच्या निर्णयामुळे सध्या सेवेत असलेल्या व नव्याने शिक्षक होऊ इच्छिणाऱ्या सर्व उमेदवारांना टीईटी परीक्षा बंधनकारक करण्यात आली आहे. त्यामुळे टीईटी परीक्षेसाठी अर्ज करणाऱ्या उमेदवारांच्या संख्येत मोठी वाढ झाली आहे. त्यातच नीट परीक्षेचा पेपर फुटल्यामुळे नीट परीक्षा येत्या 21 जून रोजी पुन्हा नव्याने आयोजित केली जाणार आहे. नॅशनल टेस्टिंग एजन्सीने देशभरातील विविध परीक्षा केंद्र नीट परीक्षेसाठी घेतले आहेत. NEET व TET या दोन्ही परीक्षांसाठी बहुतांशी एकच केंद्र असल्यामुळे टीईटी परीक्षा विद्यार्थी हित लक्षात घेता पुढे ढकलण्यात आली आहे.
राज्य परीक्षा परिषदेने टीईटी परीक्षा 21 जून ऐवजी आता 28 जून रोजी घेण्याचे आयोजन केले आहे. परीक्षेसाठी पात्र असलेल्या उमेदवारांना 16 जून ते 28 जून या कालावधीत प्रवेश पत्राची प्रिंटआऊट काढून घेता येईल. टीईटी परीक्षा पेपर क्रमांक एक 28 जून रोजी सकाळी साडेदहा ते दुपारी एक या वेळेत होणार आहे. त्याचप्रमाणे टीईटी परीक्षा पेपर क्रमांक दोन 28 जून रोजी दुपारी अडीच ते सायंकाळी पाच वाजेपर्यंत घेतला जाईल.
राज्य परीक्षा परिषदेने काही कारणास्तव परीक्षेच्या तारखा आहेत बदल केला असला तरी यापुढील काळात काही प्रशासकीय अडचणीमुळे सदर वेळापत्रकामध्ये सुद्धा बदल होण्याची शक्यता नाकारता येत नाही. परंतु, परीक्षेसंदर्भातील अद्ययावत माहिती परीक्षा परिषदेच्या संकेतस्थळावर प्रसिद्ध केली जाईल, याची उमेदवारांनी नोंद घ्यावी, असेही परीक्षा परिषदेच्या आयुक्त अनुराधा ओक यांनी स्पष्ट केले आहे.
