NEET पेपर फूटी प्रकरणात पुण्यातील प्राध्यापिका मनीषा मांढरे यांना अटक; मॉडर्न कॉलेज प्रशासन करणार कारवाई
मनीषा मांढरे या पुण्यातील शिवाजीनगर येथील मॉर्डन कला विज्ञान व वाणिज्य महाविद्यालयात 2002 पासून कार्यरत आहेत. इयत्ता अकरावी बारावीच्या जीवशास्त्र विषयाचे त्या अध्यापन करीत आहेत. त्यांच्या अध्यापनातील अनुभव लक्षात घेऊनच नॅशनल टेस्टिंग एजन्सीने नीट परीक्षा संदर्भातील गोपनीय कामकाजासाठी त्यांची नियुक्ती केली होती.
eduvarta@gmail.com 
एज्युवार्ता न्यूज नेटवर्क
नीट पेपर फुटी प्रकरणी प्राध्यापक पी. व्ही.कुलकर्णी यांना अटक केल्यानंतर आता सीबीआयने पुण्यातील जीवशास्त्र विषयाच्या प्राध्यापिका मनीषा मांढरे यांना दिल्लीतून अटक केली आहे. मनीषा मांढरे या पुण्यातील शिवाजीनगर येथील मॉडर्न कॉलेजच्या प्राध्यापिका आहेत. मांढरे यांना अटक झाल्यानंतर मॉडर्न महाविद्यालयाने याबाबत प्रसिद्धी पत्रक काढून संबंधित शिक्षकेविरोधात आवश्यक ती चौकशी प्रक्रिया पूर्ण करून नियमानुसार शिस्तभंगाची कारवाई केली जाईल, असे कळविले आहे.
मनीषा मांढरे या पुण्यातील शिवाजीनगर येथील मॉर्डन कला विज्ञान व वाणिज्य महाविद्यालयात 2002 पासून कार्यरत आहेत. इयत्ता अकरावी बारावीच्या जीवशास्त्र विषयाचे त्या अध्यापन करीत आहेत. त्यांच्या अध्यापनातील अनुभव लक्षात घेऊनच नॅशनल टेस्टिंग एजन्सीने नीट परीक्षा संदर्भातील गोपनीय कामकाजासाठी त्यांची नियुक्ती केली होती. या प्रकरणातील सर्व माहिती ही संबंधित व्यक्ती आणि नॅशनल टेस्टिंग एजन्सी यांच्या होत असते. त्यात महाविद्यालय प्रशासन अथवा संस्थेचा कोणताही संबंध येत नाही.
मनीषा मांढरे यांना अटक झाल्याची माहिती प्रसार माध्यमांद्वारे समोर आले, ही बाब अत्यंत गंभीर दुर्दैवी व निंदनीय आहे. या प्रकरणी संस्थेने गंभीर दखल घेतली असून महाराष्ट्र खाजगी शाळातील कर्मचारी सेवा शर्ती नियमावलीच्या कायद्यातील तरतुदीनुसार संबंधित शिक्षिकेवर कारवाई केली जाणार आहे,असे संस्थेचे कार्यवाह प्रा.शामकांत देशमुख व प्राचार्य डॉ.निवेदिता एकबोटे यांनी कळविले आहे.
दरम्यान,नीट पेपर फुटी प्रकरणी मनीषा मांढरे यांच्यासह पुण्यातील मनीषा वाघमारे यांना अटक करण्यात आले असून संबंधितांना न्यायालयात हजर करून पुढील तपासासाठी न्यायालयीन कोठडी मागितली जाणार आहे. एकूणच नीट पेपर फुटी प्रकरणी सीबीआयकडून अत्यंत वेगाने तपास केला जात असून आरोपींना ताब्यात घेतले जात असल्याचे दिसून येत आहे.
